VIQUEQUE, 07 setembru 2023 (TATOLI)—Ekipa hosi Sekretariadu Tékniku Administrasaun Eleitorál (STAE) munisípiu Viqueque, iha kinta ne’e, halo teste eskrita ba kandidatu na’in-522 Pesoál Apoia STAE ba Eleisaun Suku (PASES) no aldeia (PASEA) ba eleisaun suku tinan 2023.
“Ami hahú teste eskrita ba kandidatu ne’ebé atu apoia ba eleisaun suku no aldeia sira. Depois ida-ne’e, aban sei kontinua halo selesaun kandidatu sira ne’ebé konkorre ba vaga eleisaun komunitária,” Diretór STAE munisípiu Viqueque, Humberto Fernandes, informa ba agência Tatoli, iha ninia knaar fatin, postu Viqueque Vila, kinta ne’e.
Notísia relevante : Administradór Uatulari enkoraja feto kandidata-an ba xefe suku
Hafoin termina prosesu ne’e, STAE sei kontinua halo entrevista kada kandidatu ne’ebé liu prosesu teste eskrita tanba vaga ne’ebé loke ba ema na’in-234 hodi destaka ba aldeia ida ema na’in-ida.
Tuir dadus, aplikante ba PSES na’in-108 no PSAA hamutuk na’in-414, ho totál kandidatura na’in-522.
Teste ne’e realiza iha kada postu, ne’ebé hosi postu Lacluta iha kandidatu na’in-44, Ossu na’in-105, Uatucarbau na’in-75, Uatulari na’in-163 no Viqueque Vila na’in-135.
“Rekrutamentu pesoál sira-ne’e atu fó apoia ba suku no aldeia. Karik iha ne’ebá mak ema la kompreende buat ruma, sira bele esklaresidu, la presiza hato’o mai ami iha munisípiu. Tanba ne’e maka ita destaka pesoál sira ne’e no pesoál sira ne’ebé agora tuir teste ne’e bainhira sira liu ami sei fó formasaun atu sira bele hatene,” nia hato’o.
Tuir Diretór, ekipa STAE halo hela preparasaun iha parte lojístika, rekursu, resensiamentu eleitorál iha kada postu no agora daudaun ne’e prepara hela formatu lista kandidatu sira, nune’e hein aseitasaun hosi ministériu atu hahú distribui lista sira ba kada suku no aldeia.
Jornalista : Vitorino Lopes da Costa
Editora : Julia Chatarina
