OÉ-CUSSE, 07 setembru 2023 (TATOLI – Crisviano Bobelo, nu’udar sobrevivente hosi masakre Tumin sente sei trauma ho nia istória pasada iha akontesimentu masakre 08 no 09 setembru 1999, hetan baku, tá no tiru hosi milísia pro-integrasaun.
Sobrevivente ne’e konta, durante kalan haat, nia subar no toba mesak iha fatuk ko’ak ida naran PEHE, iha área Sunkaen, Nusa Tenggara Timur (NTT).
“Kalan haat nia laran ne’e, ha’u-nia kanek sira-ne’e, hahú ular hotu ona. Atu tama ba kalan lima, maka katuas ida naran Son Siki, hetan ha’u. Nia hateten ba ha’u. Labele sai hosi fatin ne’e. Husik ha’u mak ba buka ai-moruk atu kura ó-nia kanek sira-ne’e, to’o agora ha’u sei trauma,” Crisviano Bobelo, ba Tatoli ho lian triste.
Imajen Tatoli/Abilio Elo Nini.
Sobrevivente masakre Tumin, Crisviano Bobelo, ‘manu-mean’ hosi Organizasaun Jesus Homen Salvador (JHS) hateten, ba Jornalista Agência TATOLI, Abílio Elo Nini, iha nia rezidénsia Tumin, suku Bobometo, sub-rejiaun Oésilo, kinta (07 setembru 2023).
“Buat-ne’ebé ha’u sente nunka lakon iha ha’u-nia moris, mak ida-ne’e, susar atu ka moris iha momentu ne’ebá, liuliu iha ha’u-nia hanoin, tanba dalaruma ha’u tur mesak sempre mosu iha ha’u-nia hanoin, no dalaruma ha’u rona de’it ema haklalak, ha’u sempre lembra fila-fali hahalok aat ne’ebé mai hosi maluk sira halo ba ita iha mumentu ne’ebá, trauma,” nia haktuir.
Notísia relevante: Masakre Tumin: “Subar kalan haat, ha’u-nia kanek ne’e ular hotu”
Maibé nia dehan, independénsia nia konsekuénsia maka hanesan ne’e duni, hanesan sobrevivente lori kanek lubun iha nia isin-lolon.
“La’ós ha’u mesak, inan-aman sira-ne’ebé maka momentu partisipa sai vítima iha akontesimentu ne’e sei trauma, maske ita konsiensia atu haluha maibé susar tebes atu lakon hosi ita-nia hanoin, tanba ita hatene, haree ho matan no sente rasik saida mak akontese ba ita rasik isin-lolon,” nia katak.
Tanba iha momentu ne’ebá 1999, vítima masakre Tumin ne’e ho idade tinan 18, primeira-véz partisipa votasaun ,iha eskola primária Nibin, suku Usitaqueno, bainhira vota tiha sai li’ur sente la ta’uk hodi la’o ba-mai.
“Ami vota mós la’ós ha’u mesak, kolega barak, inklui balu momentu sira eskola iha Díli mós mai hotu iha-ne’e, maibé hafoin akontesimentu iha loron 08 no 09 setembru 1999, barak mak lakon vida, barak mak universidade iha UNTIM,” nia haktuir.
Notísia relevante: Komunidade Tumin-Quibiselo hasa’e bandeira iha uma oin hanoin hikas 09 setembru 1999
Maske laiha apoia ruma hosi parte Governu maibé família hosi sobrevivente família mártir sira la haluha, katak objetivu iha komemorasaun ne’e la’ós atu ba kontente de’it maibé tenke hanoin hikas fali, loron importante rua, 08 no 09 setembru 1999 nian, ohin loron halo tinan 23.
“Tan ne’e ita espera katak, ba futuru Governu mós presiza konsidera loron ida, sai hanesan loron istóriku ida ba Oé-Cusse, nune’e ema hotu bele feriadu hodi ba kari ai-funan ka sunu-lilin, tanba sira mate ne’e defende Timor-Leste atu hetan ukun rasik-an,” sobrevivente ne’e fó hanoin ba Governu.
Nia hateten, dalaruma família balu lakon sira-nia aman, la’en ka oan, uma-kain ida bele lakon família tolu ka haat, tanba mate ne’e la’ós uitoan de’it maibé 80-resin mak mate iha loron rua ne’e, tán ne’e kada tinan selebra.
Nia informa, kada tinan iha selebrasaun ne’e, parte komisaun la distribui konvite, maibé partisipasaun mai hosi suku hotu-hotu, ida-ne’e hatudu katak ema hotu iha konsiénsia.
Notísia relevante: Masakre Tumin: Milísia oho ema na’in-14 iha 08 setembru 1999 (I)
Jornalista : Abílio Elo Nini
Editór : Evaristo Soares Martins
