COVALIMA, 08 setembru 2023 (TATOLI)-Sekretáriu Administradór Munisípiu Covalima, Francisco de Jesus Alves, hateten autoridade munisípiu maka sei organiza kona-ba prosesu eleisaun suku ne’ebé tuir kalendáriu sei hala’o iha fulan-outubru 2023.
“Bazeia ba lei Administrasaun Munisípiu Covalima (AMC) sei organiza eleisaun ba xefe suku, maibé ita halo koordenasaun téknikamente ho STAE mak implementa, no hetan akompañamentu husi autoridade covalima ita fó apoiu másimu ba servisu hirak ne’e,” Nia hateten ba jornalista-sira iha resintu AMC Sukaer-laran, sesta ne’e.
Daudaun ne’e, adminsitrasaun munisípiu Covalima servisu hamutuk ho STAE hodi halo rekrutmentu ba pesoál STAE apoiu suku no pesoál STAE apoiu aldeia (SPAA) no mós fó ona apoiu ba Komisaun Nasionál eleisaun (CNE- sigla portugés ) hodi halo ona rekrutamentu ba pesoál ne’ebé sei fiskaliza durante eleisaun suku ne’e.
“Ita hahú halo ona rekrutamentu ba pesoál ne’ebé sei organiza eleisaun ba xefe suku no xefe aldeia no postu administrativu tolu hahú halo ona teste eskrita balun ohin mak foin mak hahú,”nia hateten.
Tuir nia depois rekrutamentu, sei fó mós formasaun kona-ba lalaok eleisaun ba pesoál STAE apoiu suku no pesoál apoiu aldeia sira nune’e bele realiza eleisaun lideransa komunitária ne’e ho susesu.
Prosesu simu kandidatu xefe suku foun iha Covalima, nia informa tuir kalendariu sei hahú iha loron 13 fulan-outubru ne’e.
Entertantu, Diretór STAE Francisco Gusmão, hateten STAE Covalima fó ona testu eskrita ba pesoál apoiu aldeia no suku hosi postu administrativu Maucatar, Fohorem, Fatumea no Tilomar.
“Ita agora hahú fó ona teste eskrita ba kandidatu pesoál STAE apoiu suku no pesoál STAE apoiu aldeia (SPAA) hodi organiza eleisaun xefe suku,” nia hateten.
Tuir oráriu hahú iha loron 07 fulan setembru ne’e, STAE teste ba pesoál STAE apoiu suku no pesoál STAE apoiu aldeia (SPAA) iha Fatululik, Fatumea, Maucatar no Fohorem.
Nune’e mós iha loron 08 fulan-setembru hala’o teste hanesan ba kandidatu pesoál STAE apoiu suku no pesoál STAE apoiu aldeia (SPAA) iha postu administrativu postu Suai, Zumalai no Tilomar.
Entretantu, administradór postu administrativu Zumalai, Rui dos Santos, reforsa Sekretáriu tékniku administrasaun eleitorál (STAE), ohin hala’o ona teste ba kandidatu pesoál STAE apoiu suku no pesoál STAE apoiu aldeia (SPAA) iha postu Zumalai hodi prepara ba eleisaun xefe suku, no rezultadu teste eskrita ne’e sei públika iha loron 9 to’o 21fulan-setembru ne’e.
“Iha loron 13 to’o 14 fulan-setembru sei hala’o teste eskrita ba kandidatu pesoál STAE apoiu suku no pesoál STAE apoiu Aldeia (SPAA) ne’ebé pasa iha teste eskrita hafoin rezulta finál sei públika iha loron 15 fulan-setembru.
- Autoridade munisípiu Covalima enkoraja feto kandidata aan ba Xefe Suku
Sekretáriu Administradór Munisípiu Covalima, Francisco de Jesus Alves, enkoraja sira feto iha munisípiu ne’e atu kandidata aan ba xefe suku iha eleisaun suku ne’ebé sei akontese iha fulan-outubru 2023.
“Ita fó korajen maka’as ba feto-sira atu kompete iha eleisaun ba xefe suku sira, tanba ita respeita igualdade jéneru, ita promove feto sai lideransa iha suku, nune’e bele jere sira-nia suku,” Francisco de Jesus Alves, hateten ba jornalista sira iha resintu AMC sukaer-laran, sesta ne’e.
Munisípiu Covalima iha suku hamutuk 30, maibé xefe suku atuál iha feto na’in ida de’it maka sai xefe suku iha suku Maudemo, postu administraivu Tilomar no xefe suku 29 mesak mane de’it, tanba ne’e enkoroja feto atu partisipa másimu liután iha eleisaun tuirmai.
“Haree ita-nia situasaun kultura ne’ebé ladun fó oportunidade ba feto-sira nune’e autoridade covalima sei esforsu atu dudu kandidatu feto ba oin hodi hatudu sira-nia prestasaun lideransa nune’e komunidade hili feto sai hanesan lideransa komunitária,”nia dehan.
Nune’e mós antes ne’e, Komandante PNTL Munisípiu Covalima, Superintendente Calisto Gonzaga mós enkoraja feto atu konkore iha eleisaun xefe suku.
Entertantu, Munisípiu Covalima ho nia postu administrativu hitu kompostu hosi Fatululik, Fatumea, Fohorem, Fatumea, Tilomar ,Maucatar Zumalai no Suai ho nia suku 30 no aldeia 148.
Jornalista: Celestina Teles
Editór: Agapito dos Santos.
