DILI, 08 setembru 2023 (TATOLI)—Reprezentante povu iha uma fukum Parlamentu Nasionál (PN) liuhosi Deputada bankada PD, Maria Teresa Gusmão, aseita planu Governu liuhosi Ministéiru Komérsiu Indústria (MKI) atu subsidia povu relasiona ho folin foos kontinua sa’e iha merkadu ne’ebé afeta ba povu kbiit laek nia moris.
Notísia Relevante: Governu sei subsidia povu tanba folin foos iha merkadu
“Ha’u rona no akompaña iha mídia liuhosi Ministeriu Komérsiu Indústria (MKI) nia gabinete, se desizaun MKI atu halo ida-ne’e ami apoia no konkorda tebes. Folin foos ne’ebé sa’e, dalaruma la’ós ita-nia taxa ne’ebé boot maibé mós nasaun ne’ebé importa foos mai bele mós sira folin aas tiha ona hosi ne’eba. Maibé, Governu haree ida-ne’e se todan Ministériu Komérsiu Indústria interven to’o dalan klaran atu fasilita povu sira, ne’e ita agradese tebes. Tanba ita Timor hahan nesesidade bázika liu mak foos, se folin boot tebes sai kestaun ida ba populasaun,” Deputada PD ne’e hateten ba jornalista sira iha uma fukum PN, sesta ne’e.
Modelu subsidia ne’e, nia hateten, Governu mak bele diskute oinsá fó apoiu ba povu, tanba PN aprova ona redús taxa fila-fali ba normál iha lei orsamentu retifikativu tinan 2023, no hetan ona promulgasaun hosi Prezidente Repúblika, tan ne’e folin sasán sa’e hanesan foos ida-ne’e estoke tuan maibé presiza intervensaun duni hosi Governu.
Deputadu Fretilin, David Dias Ximenes ‘Mandati’, hateten subsidia ne’e Governu mak hatene maibé situasaun defisil sira Governu bele subsidia hanesan saida mak iha Governu anteriór halo ona.
Nia mós preokupa redusaun taxa iha lei Orsamentu Retifikativu aprovadu ona maibé tanbasá sasán folin aumenta liután liuliu folin foos ne’ebé hetok sa’e beibeik.
Prezidente Komisaun D trata asuntu Ekonómia no Dezenvolvimentu, Deputadu Ricardo Baptista, hateten presu foos ne’ebé daudaun folin kontinua sa’e tanba ne’e estoke tuan hosi importadór sira faan hela.
Maibé hein katak estoke tuan hotu presu bele fila ba normal, tanba taxa iha lei Orsamentu Retifikativu aprovadu ona, nune’e planu iha tempu badak mós komisaun sei hala’o fiskalizasaun ba iha importadór foos sira hodi haree direta.
Jornalista : Nelson de Sousa
Editór : Cancio Ximenes
