DILI, 08 setembru 2023 (TATOLI)—Membru Parlamentu Nasionál (PN), liuhusi Deputada PD, Maria Teresa Gusmão, husu Ministériu Saúde (MS) atu tau atensaun rezolve lalais problema aimoruk “stock out” ai-moruk iha ospitál sira.
Notísia Relevante: Aimoruk item sia mamuk iha Servisu Saúde Manatutu
“Loos, problema aimoruk stock out, ita-nia pasiente sira kontinua hasoru. Fulan rua ba kotuk, ami komisaun F (trata asuntu Saúde) hala’o fiskalizasaun ba SAMES no Hospital Nasionál Guido Valadares rasik. Nune’e, Komisaun rasik bolu ona Ministra Saúde no ninia rezultadu foin daudaun iha debate programa IX Governu ho orsamentu retifikativu ba 2023 haree katak, ministériu aumenta ona orsamentu atu responde ba preokupasaun sira-ne’e. Nune’e, hein bele responde lalais, tanba orsamentu retifikativu promulga ona,” Deputada PD ne’e hateten ba jornalista sira iha uma fukun PN, sesta ne’e.
Tuir nia, fiskalizasaun ne’ebé hala’o identifika problema stoke out ne’e kontinua mosu tanba orsamentu ladún sufisiente aloka ba ida-ne’e, situasaun COVID-19, funu Rúsia ho Ukránia halo mundu tomak sofre impaktu ne’eduni prosesu administrasaun no mós burokrásia prosesu aprovizionamentu.
Nune’e, ba oin labele akontese tan problema sira-ne’e mak presiza had’ia burokrásia ho sistema nune’e atu sosa aimoruk haree ninia prazu liu ona no sosa durasaun ba tinan rua liu no nia prazu mós liu hanesan tuir konkursu ne’ebé atu kompra medikamentu.
“Tanba ne’e, mekanizmu atu labele kontinua akontese tan situasaun sira-ne’e mak prevee orsamentu adekuadu ba aimoruk no ninia ekipamentu hotu, hadi’a sistema,” nia hateten.
Deputadu FRETILIN, David Dias Ximenes, hateten preokupa problema aimoruk stock out ne’ebé problema ne’e sempre levanta iha PN, maibé parte relevante la solusiona ho lalais, nune’e nia ezije atu tau atensaun makaas tanba povu no pasiente sira hakarak hetan atendimentu ba saúde ho dignu.
Jornalista : Nelson de Sousa
Editór : Cancio Ximenes
