DILI, 08 setembru 2023 (TATOLI)-–Ministru Obra Públika, Samuel Marçal, hala’o vizita ba edifísiu Bee Timor-Leste, Empreza Públika (BTL, E.P) hodi ko’alia direta ho responsável no funsionáriu.
“Kontinua servisu maibé tenke servisu ho vontade tomak, hatudu atitude di’ak nomós servisu ho responsabilidade, nune’e bele serví povu no nasaun ida-ne’e ho di’ak liután liuhosi fornesimentu bee-moos. Tanba iha setór bee hanesan servisu ne’ebé liga direta ho ema-nia moris. Ha’u ko’alia maka’as oitoan iha BTL, E.P tanba servisu ida-ne’e hanesan servisu ne’ebé importante tebes kompara ho unidade sira seluk, tanba ita-nia servisu ligasaun direta ho ema-nia vida, la’ós oras ba oras, minutu ba minutu, maibé detik ba detik ema sempre hemu bee. Ha’u husu ba ita hotu, ba ha’u-nia alin sira, lori matebian no ema sira ne’ebé mate ba rai ida-ne’e, ho sira nia naran no sira-nia hanoin tomak, fó hatene ba imi hotu, atu servisu ho laran no fuan ba, hodi kuidadu ita-nia rain ne’e, katak servisu ba ita-nia rai, servisu hanesan buat ne’e imi nian rasik,” Samuel fó hanoin iha ámbitu hasoru malu ho funsionáriu iha edifísiu BTL, E.P, Caicoli, kinta (07/09).
Biban ne’e, Ministru hetan akompañamentu hosi Vise-Ministru Infraestrutura, Júlio do Carmo, Sekretáriu Estadu Eletrisidade, Bee no Saneamentu, Santos Noronha, ne’ebé simu direta hosi Prezidente Komisaun Ezekutiva BTL, E.P, Carlos Peloi dos Reis no estrutura inklui funsionáriu sira.
Objetivu vizita ne’e hodi observa kondisaun jerál nomós hodi ko’alia no rona direta funsionáriu sira-nia preokupasaun atubele buka solusaun, nune’e bele rona mós orientasaun.
Notísia relevante : BTL, E.P sei halo melloramentu ba sistema bee-moos iha kapitál
Governante ne’e hameno hela ba funsionáriu sira, bainhira iha problema ruma tenke relata direta ba superiór no labele abandona servisu hodi prejudika fali populasaun.
“Iha problema ruma mai ita ko’alia iha oin hanesan maun no alin, hanesan timor-oan, tau uluk ita-nia preokupasaun ba depois ita buka solusaun no labele kria prbblema hodi impede servisu. Ha’u iha ne’e, Vise no Sekretáriu Estadu iha ne’e, ami mai laran metin ba imi hotu. Mai ita servisu hamutuk, rai Timor ita nian, ne’ebé rai kiik no foin hambriik mai ita hotu tane nia para nia bele la’o nafatin. Tanba ne’e, ha’u husu bai mi hotu, ha’u husu ba imi ne’ebé servisu iha instituisaun ne’ebé importante, mai ita hotu hamutuk hodi serví ita-nia povu no ita-nia rai di’ak liután,” nia akresenta.
Ministru Obra Públika husu ba BTL, E.P atu nafatin halo sosializasaun liga ho komunidade balun kontinua halo ligasaun bee ho dalan ilegál, nune’e presiza masimiza sosializasaun hodi disemina informasaun kona-ba utilizasaun bee tuir padraun ou regra ne’ebé mak loos no di’ak.
Maski nune’e, governante ne’e apresia funsionáriu sira-nia servisu, liu-liu tékniku sira ne’ebé hala’o servisu iha terrenu, maski tékniku balun hetan baku ou agresaun fízika hosi komunidade sira iha oras servisu nian iha terrenu.
Funsionáriu BTL, E.P hamutuk 365 inklui Komisaun Ezekutiva na’in-tolu antes ne’e rekrutadu tuir regulamentu.
Jornalista : Antónia Gusmão
Editora : Julia Chatarina
