iklan

NASIONÁL, HEADLINE, KAPITÁL

BTL, E.P sei halo melloramentu ba sistema bee-moos iha kapitál

BTL, E.P sei halo melloramentu ba sistema bee-moos iha kapitál

Diretór Operasionál no Manutensaun BTL, E.P, Aleixo dos Santos. Imajen Tatoli/Francisco Sony

DILI, 10 agostu 2023 (TATOLI)Bee Timor-Leste, Empreza Públika (BTL, E.P) sei halo melloramentu ba sistema bee-moos hotu iha kapitál Dili hodi fasilita komunidade hotu bele asesu.

“Daudaun ne’e tama ona tempu bailoro, ne’ebé impaktu ba rekursu bee sei menus. Relasiona  ho kestaun ne’e ita-nia parte sei halo melloramentu hotu ba sistema bee-moos iha kapitál inklui munisípiu hotu ne’ebé halo ligasaun bee ba kada komunidade nia uma hodi bele asesu ba bee-moos,” Diretór Operasionál no Manutensaun BTL, E.P, Aleixo dos Santos, informa ba Agência Tatoli, iha ninia knaar fatin, Caicoli, kinta ne’e.

Nia husu atu komunidade ne’ebé daudaun ne’e asesu ona bee-moos bele taka torneira bainhira la uza, nune’e bele retein fali bee atu ema hotu bele asesu.

Notísia relevante : BTL, E.P hahú dada bee-moos ba xefe família besik 600 iha Soibada

Daudaun ne’e perfurasaun bee-moos iha kapitál Dili hamutuk 31 no sei iha tempu badak sei instala tan foun balun ho objetivu komunidade hotu bele asesu bee-moos.

“Perfurasaun ne’ebé iha ona loloos bee sufisiente ona ba ita, maibé nafatin parte balun kontinua halerik tanba iha ema balun menus konsiénsia halo ligasaun ilegál,” nia akresenta.

Diretór Operasionál husu ba komunidade kapitál Dili iha situasaun bailoro tenke evita halo ligasaun ilegál, nune’e BTL, E.P bele jere ho di’ak, se lae bele fó impaktu ba maluk sira seluk la asesu.

“Hosi perfurasaun bee-matan 31 ne’ebé ita iha, loloos bee resin ona ba ita tanba populasaun  Dili hamutuk 300.000 resin, maibé to’o agora kontinua la to’o tanba ita seidauk iha jestaun di’ak. Ida-ne’e la’ós de’it hosi BTL, E.P maibé mós hosi komunidade hotu,” Responsável ne’e salienta.

Maski nune’e, empreza estatál ne’e kontinua esforsu nune’e iha tempu bailoro komunidade bele asesu hotu.

“Komunidade ne’ebé hela iha fatin foho lolon no balun ne’ebé hela iha fatin dook hosi estrada labele asesu bee-moos tanba kanu ne’ebé BTL, E.P dada liu estrada ibun de’it, entaun komunidade ne’ebé besik ne’ebá mak bele asesu, tanba bazeia ba ami-nia padraun, bainhira komunidade hakarak asesu bee, kanu tenke liga maizumenus metru 6 hosi uma,” nia esplika.

Razaun seluk komunidade iha kapitál Dili halerik nafatin ba bee-moos tanba sira ne’ebé liga bee ba uma lori sanyo dada ilegál hodi halo fali atividade sira seluk hanesan rega modo, fase karreta, motór no atividade seluk tan.

“Ita apela nafatin ba maluk sira ne’ebé komete ba aktu ida-ne’e tenke halo rejistu tama iha kategoria komersializasaun no ita-boot sira tenke uza mós tuir padraun BTL, E.P nune’e labele fó fali impaktu ba ema seluk,” Aleixo dos Santos fó hanoin.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!