DILI, 08 setembru 2023 (TATOLI) – Universidade de Dili (UNDIL) realiza graduasaun ba estudante finalista 161 husi fakuldade sira iha Saúde Públika, Ekonomia, Siénsia Polítika no Enjeñaria.
Iha ámbitu serimónia graduasaun Reitór UNDIL, José Agostinho Belo, husu ba graduandu sira atu hamorin nafatin universidade nia naran iha sosiedade nia leet.
“Ba estudante finalista sira labele sente loron ida ne’e ikus ba imi, tanba imi sei filafali bá hamutuk ho komunidade, hamutuk ho Estadu no sei hela nafatin iha rai ida ne’e. Karik seidauk iha abilidade sufisiente atu garante futuru ida di’ak, tenke buka aprende nafatin atu sai graduandu ida ne’ebé kualidade”, José Belo hatete iha salaun CNE, Caicoli, ohin
Bainhira finalista sira hasoru difikuldade iha sosiedade nia leet, reitór ne’e husu atu sira bele nafatin kontaku ho universidade, nune’e bele hetan esplikasaun ruma hodi tulun sira-nian prezensa iha sosiedade.
Iha tinan ida ne’e UNDIL la fó graduasaun ba estudante sira ho númeru ne’ebé boot, tanba hakarak atu garante kualidade ba nia emar sira no hakarak atu estudante sira ne’ebé preparadu ona mak bele gradua.
“Ho númeru ne’ebé ki’ik importante ba UNDIL maka tenke iha nafatin kompromisu hodi aposta ba kualidade tanba Timor-Leste daudaun ne’e esforsu hela atu tama ba ASEAN. Tanba ne’e, kualidade iha kada universidade sira iha Timór tenke garantidu, nune’e bele prodús estudante sira ho kualidade no responsabilidade iha futuru”, dehan.
Finalista husi Fakuldade Siénsia Polítika Frederico Pinto hateten katak siénsia ne’ebé maka nia hetan durante tinan haat nia laran ida ne’e hanesan bukae ida atu uza hodi implementa iha futuru.
“Hahú ohin bá oin, ha’u sei hasoru obstákulu no laloran boot iha ha’u-nian oin, maibé hanesan ema ne’ebé hetan ona bukae nato’on, ha’u prontu hasoru dezafiu sira ne’e”, afirma.
Nia kompromete katak prontu hatudu nia aan nu’udar alumni UNDIL ne’ebé preparadu ona atu serbisu ho komunidade hodi lori nasaun ne’e ba dezenvolvimentu ida di’ak liu iha futuru.
Jornalista: Tomé Amado
Editora: Maria Auxiliadora
