BOBONARU, 04 Maiu 2026 (TATOLI)-Servisu Sekreta Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) halo apreensaun ba kilat-manu 12, iha área Akadiru-Laran, aldeia Oplegul, suku Holsa, postu administrativu Maliana, munisípiu Bobonaru.
Kilat-manu ne’e autoridade seguransa sira apreede iha domingu, 03 Maiu, iha madrugada tuku 03h10. Sidadaun sira ne’ebé hatama ilegalmente kilat ne’e husi nasaun viziña, Atambua-Indonézia.
Komandante Polísia Munisípiu Bobonaru, Superintendente Xefe Damião da Silva Correia, informa katak sasán kontrabandu ne’e suspeitu na’in-rua mak transporta ho motorizada husi diresaun fronteira suku Tapó-Memo ho intensaun atu fa’an ba ba komunidade iha munisípiu seluk.
Notísia relevante: PNTL Bobonaro halo apreensaun kilat-manu ualu iha karreta laran
“Tuir informasaun, sira iha motór rua, más motór ida ho labarik konsege halai, tanba tuku 03h10 ne’e sei nakukun. Motór ida mak apreende kilat manu 12 ho nia opor haat. Ida-ne’e kategria flagrante delitu bazeia ba lei númeru 05/2017 kona-ba arma-branka. Entaun, sira lori mai aprenzente ba Komand Munisípiu Bobonaru”, nia dehan ba jornalista sira, ohin.
Komandante ne’e relata katak objetu apreendidu no suspeitu mane ida orijen husi suku Kota-Bo’ot, postu administrativu Bobonaru, daudaun e’e asegura hela iha Kuartél Komandu Polísia Munisípiu Bobonaru.
“Evidénsia no suspeitu agora ita prepara atu entrega ba Ministériu Públiku hodi kontinua prosesu. Ba suspeitu ida halai lakon ami sei kontinua buka tuir”, nia hatutan.
Autoridade seguransa no defeza sei kontinua serbisu hamutuk ho autoridade munisípiu Bobonaru atu garante seguransa iha liña fronteira hodi prevene atividade illegal, liuliu sasán kontrabandu.
Aleinde ne’e, sei serbisu hamutuk ho Komandu Polísia Munisípiu Ermera ho Ainaru no seluk tan atu halo vijilánsia no operasaun ba sirkulasaun kilat-manu.
Notísia relevante: UPF halo apreensaun ba kilat-manu ilegál hosi Atambua
Jornalista: Sergio da Cruz
Editora: Maria Auxiliadora
