Ai monu hanehan uma ida iha Dom Bosco Maliana
MALIANA, 11 setembru 2023 (TATOLI) – Akontesimentu anin ho velosidade maka’as, segunda ne’e rezulta ai-teka Timor hún ida monu hanehan estraga abitante nia uma ida iha bairru Dom Bosco, aldeia Loloa, suku Holsa, postu administrativu Maliana, munisípiu Bobonaro.
Martinha Moniz nu’udar uma na’in, haktuir akontesimentu ne’e akontese iha meudia tuku 12:00 bainhira sira iha hela uma-laran.
“Ami haan hela, ha’u maun ho nia ferik-oan, ho labarik na’in-haat, anin-boot derrepentr ai ne’e monu tun neineik de’it, sei tahan hela, ami halai sai hotu ba li’ur, lakleur ema mai, bombeiru mós mai, iha ema barak nia oin mak ai ne’e monu fera uma ne’e, sorte ami, se lae ami atu sai oinsa,” nia informa ba Tatoli iha fatin akontesimentu.
Nia konfirma, akontesimentu dezastre naturál la rezulta ema ruma kanek inklui sasán uma laran.
“Kalen ha ai de’it mak estraga, maibe ami hadi’ak fali ba hela aguenta lai,” vitima Martinha Moniz dehan.
Hafoin akontesimentu, parte Autoridade Protesaun Sivíl Munisipiu Bobonaro tun kedas halo intervensaun hodi tesi ai refere no ai sira seluk ne’ebé risku inklui fó apoia emerjénsia hanesan foos, mina, supermie no sasán sira seluk tán.
“Ami hato’o obrigadu barak ba Protesaun Sivíl tanba ajuda ona ami, espera bele fó tán apoia sasán seluk atu ami bele hadi’ak fali uma ne’e,” nia husu.
Enkuantu tuir observasaun Agência Tatoli iha terrenu nota katak, família no komunidade sira daudaun ne’e hadi’ak fila-fali uma ne’e atu nune’e vítima bele hela hanesan bainbain.
Notísia relevante: Uma-kain 30 iha Bobonaro afetadu dezastre naturál
Jornalista: Sérgio da Cruz
Editór: Evaristo Soares Martins
