BOBONARO, 08 marsu 2023 (TATOLI) – Autoridade Protesaun Sivíl (APC, sigla portugés) Munisípiu Bobonaro, identifika uma-kain hamutuk 30 mak afetadu hosi dezastre naturál hahú hosi fulan-fevereiru to’o fulan-marsu ne’e.
Komandante APC Munisípiu Bobonaro, Inspetór José Lelo Bere, esplika dadus hirak-ne’e mai hosi postu administrativu Cailaco, Bobonaro no Balibo.
Notísia relavente: Rai-halai estraga Uma Naroman ba Povu iha Cailaco
“Hosi feveiru to’o marsu ne’e totál hamutuk uma-kain ne’ebé hetan dezastre, anin-sobu no rai-halai ne’e hamutuk iha uma-kain 30 mak sai vítima,” nia informa ba Jornalista sira iha Maliana, tersa ne’e.
Komandante ne’e dehan, dadaus provizóriu ne’e tempu badak sei aprezenta ba nasionál atubele hetan apoia emerjensia no apoia rekuperasaun.
“Vítima sira ita seidauk bele apoiu tamba problema oituan iha kombustivél,maibe ita tempu badak iha ekipa sei ba fó apoiu emerejensia,” komandante ne’e hatutan.
Maibé daudaun ne’e ekipa APC kontinua ba halo levantamentu dadus dazstre iha terrenu, liuliu akontesimentu rai-halai iha Marobo, suku Soilesu, postu administrativu Bobonaro no inundasaun suku Purugua, postu administraivu Cailaco.
Nune’e mós iha aldeia Ferik-Katuas, suku Leohitu no aldeia Fatuk-Laran, suku Balibo Vila, postu administraivu Balibo.
“Ha’u atu fó hatene ba komunidade iha munisípiu Bobonaro, agora tempu udan no anin, ne’ebé husu ba komunidade sira, karik mosu inundsaun, tenke salva uluk ita-boot sira-nia vida no família sira ba fatin ne’ebé seguru, ida-ne’e mak importante liu,” komandante ne’e apela.
Nia haktuir, iha loron 28 fulan-fevereiru akontese bee mota sa’e ameasa komunidade uma-kain 29 iha aldeia Lotan, suku Batugade, postu administrativu Balibo, maibé daudaun ne’e evakua ona bai ha sede suku.
“Ita ho ekipa risku dezastre munisípiu Bobonaro nian ita fó ona apoiu emerjénsia, atubele sustenta sira durante loron rua ka tolu iha-ne’ebá,” nia katak.
Enkuantu tuir informasaun ne’ebé Agensia Tatoli asesu, daudaun ne’e ekipa Insitutu Jestaun Ekipamentu Apoiu Dezembolvimentu Infraestrutra, Institutu Públiku (IGEADI,I.P), Brigada Maria-Tapo, mobiliza ona ekipamentu halo normalizasaun ba mota ne’ebé ameasa ba komunidade hirak-ne’e nia uma.
Notísia relevante: Uma-kain 18 iha Bobonaro sai vítima ba dezastre naturál
Jornalista : Sérgio da Cruz
Editór : Evaristo Soares Martins
