BOBONARO, 07 marsu 2023 (TATOLI) – Rai-halai estraga Uma Naroman ba Povu (UNP) ida iha suku Dau-Udu, postu administrativu Cailaco, munisípiu Bobonaro, hafoin akontese udan-boot iha iha semana kotuk fulan ne’e.
Notísia relevante: MAE distribui ona zinku ba benefisiáriu UNP+ B kuaze 4.000
“Iha suku Da-Udu iha uma UKL ne’ebé mak hetan mós rai halai, uma ne’e ita-nia governu entrega tiha iha fulan-agostu 2022, agora foin daudaun iha loron 02 marsu hetan estragu tanba impaktu hosi ra-halai, entaun ita-nia komunidade ne’e evakua ona ba nia família sira,” Komandante Autoridade Portesaun Sivíl Munisípiu Bobonaro, Inspetór Jose Lelo-Bere, informa ba jornalista sira, iha kna’ar-fatin, tersa ne’e.
Inspetór Jose Lelo Berre, dehan uma refere konsidera hetan estragu grave, tanba hahú hosi uma to’o liur inklui ninia aliserse nakfera hotu.
Tanba ne’e ekipa Autoridade Protesaun Sivíl no Diresaun Servisu Riksu Dezastre Naturál munisípiu Bobonaro tún ona ba terrenu halo levatamentu dadus atubele apoia rekuperasaun ba vítima.
“Uma ne’e seidauk entrega karik, ne’e PNDS mak sei responsabiliza, maibé tanba entrega ona ba benefisiáriu, ita hanean protesaun sivíl foti dadus bele apoiu rekuperasaun ne’e ita sei fó iha tempu badak,” Komandante ne’e dehan.
Enkuantu kona-bá inundasaun ne’ebé akontese iha suku Purugua, loron ida ka rua ekipa APC sei tún ba terrenu hodi halo verifikasaun dadus uma hira mak hetan estragu.
Tanba tuir informasaun ne’ebé APCF simu hosi administradór postu administrativu Cailaco, Alfredo Meta-Dau, katak iha uma-kain 10 mak bee hosi mota Marobo tama.
“Ha’u komunika ona ho sekretáriu autoridade munisípiu atu IGE bele apoiu normaliza mota iha iha parte Purugua nian,” nia akresenta.
Notísia relevante: Governu inaugura UNP faze daruak unidade sia iha Lahomea
Jornalista : Sérgio da Cruz
Editór : Evaristo Soares Martins
