BOBONARO, 27 janeiru 2023 (TATOLI) – Tuir dadus ne’ebé Autoridade Protesaun Sivíl Munisipiu Bobonaro, fó-sai katak hahú hosi fulan-dezembru tinan 2021 to’o janeiru 2023 ne’e identifika uma-kain 18 mak sai vítima ba dezastre naturál.
Komandante APC Munisípiu Bobonaro, Inspetór Polísia José Lelo-Bere, subliña komunidade afetadu hirak-ne’e mai hosi postu administrativu Atabae uma rua, Bobonaro uma sia, Balibo rua, Cailaco tolu no postu administrativu Maliana uma rua.
Notísia relevante: Autoridade Protesaun Sivíl apoia vítima inundasaun iha Cailaco
“Ita iha munisípiu Bobonaro totál hamutuk 18 ne’ebé mak akontese liu ba inséndiu ahi-haan uma, anin loke uma, ita-nia komunidade 18 mak hetan dezastre naturál,” nia informa ba jornalista sira, iha Maliana, kinta ne’e.
Inspetór ne’e fundamenta, vítima hirak-ne’e hetan ona apoia emerjénsia komposta hosi pakote food item no non-food item, no daudaun ne’e sira-ne’ebé uma hetan estragu grave sei hein apoia rekuperasaun.
Haree ba kondisaun klima ne’ebé durante ne’e ladún di’ak, Komandante Lelo-Bere alerta ba komunidade sira hotu iha postu administrativu neen atu hadook-aan hosi fatin risku dezastre naturál, bainhira akontese udan-boot no anin ho volume maka’as.
“Iha tempu udan ita labele obriga-aan hakuur-mota, tanba ne’e bele lori dazastre ba ita-nia komunidade, no mós anin-boot tenke hadok-aan hosi uma, tanba ne’e mak husu ba ita-nia komunidade iha kalan tenke akompaña televizaun, tanba previzaun tempu kalan sempre fó-sai hosi diresaun nasionál meterolojia, ita bele hatene aban iha munisípiu Bobonaro sei akontese udan no mós anin, ita bele hadok-aan hosi dezastre ne’ebé sei mosu iha ita-nia munisípiu rasik,” Komandante ne’e apela.
Inspetór Lelo-Bere mos dehan, APC enfrenta hela problema kona-bá transporte tanba daudaun ne’e seidauk hetan apoia karreta ruma hodi bele responde ba situasaun emerjénsia ruma.
Durante halo atendimentu utiliza karreta haat bombeiru nia, ne’ebé ho kondisaun ladún di’ak ona, tanba tuir loloos karreta hirak-ne’e tama ona ba lelaun.
“Maibé ita-nia serbisu kontinua la’o normál tanba bainhira atu ba apoiu vítima dezastre naturál autoridade munisípiu Bobonaro sempre fó apoiu karreta ita uza ba responde lalais dazastre ne’ebé mosu,” nia katak.
Enkuantu atu responde lalais komunidade ne’ebé afetadu hosi dezastre naturál APC mós daudaun ne’e halo ona rekrutamentu ba pesoál sira atu destaka ba postu administrativu hotu nune’e bele identifika rekolla informasaun kona-bá akontesimentu sira para bele hetan apoiu emerjénsia lalais.
Notísia relevante: APS rejista uma-kain 361 afetadu dezastre naturál durante semana rua
Jornalista : Sérgio da Cruz
Editór : Evaristo Soares Martins
