iklan

COVALIMA, ELEISAUN, POLÍTIKA

CNE realiza edukasaun sivíka ba komunidade Tilomar kona-ba eleisaun suku

CNE realiza edukasaun sivíka ba komunidade Tilomar kona-ba eleisaun suku

Sidadaun sira partisipa edukasaun sivíka ne'ebé realiza husi CNE,iha postu administrativu Tilomar, imajen Tatoli/Celestina Teles

COVALIMA, 11 setembru 2023 (TATOLI)-Komisaun Nasionál Eleisaun (CNE,sigla portugués), segunda ne’e realiza edukasaun sivíka ba komunidade aldeia Ai-oan, suku Lalawa postu administrativu Tilomar munisípiu Covalima.

Xefe Departamentu Jurídiku CNE Nasionál, Hélio Francisco Amaral, hateten objetivu husi edukasaun sivíka ne’e atu partilla informasaun kona-ba lala’ok eleisaun suku no papél xefe suku sira baseia ba númeru 9/2016 iha artigu 8 nian.

Notísia Relevante :Aplikante vaga CNE Covalima sei tuir teste iha semana oin

Iha programa edukasaun sivíka ne’e mós atu esplika ba komunidade sira-nia atu oinsá aprezenta sira-ninia kandidatura atu sai lideransa komunitária iha eleisaun xefe suku no aldeia.

Ami-nia prezenta iha ne’e atu fahe informasaun liga ho eleisaun ba lideransa komunitária sira ne’ebé la’os ona buat foun, maibé molok ne’e hala’o ona eleisaun suku tanba ne’e, CNE nia prezensa atu hafanun inan aman no joven sira atu kandidata aan,”nia hateten ba jornalista sira iha aldeia Ai-oan.ohin.

Nia informa Governu Konstitusionál dasiak iha loron 16 fulan-agostu 2023 liubá dekreta ona data ba eleisaun xefe suku sira ne’ebé  tuir kalendáriu sei hala’o iha loron 28 fulan-outubru 2023.

Iha tempu hanesan Reprezentante Administradór Postu Administrativu Tilomar, Evaristo Afonso Carvalho husu ba komunidade sira atu partisipa ativu iha programa edukasaun sivíka ne’e, nune’e bele komprinde di’ak liután kona-ba eleisaun suku ne’ebé sei akontese iha fulan-oin.

“Ita hotu sei rona CNE sira atu partilla informasaun ba ita hodi prepara atu realiza eleisaun suku ba sidadaun ne’ebé atu kandidata aan atu sai xefe suku tenke rona informasaun ho sériu,”nia hateten.

Tuir kriteria sidadaun ne’ebé maka atu kandidata aan ba xefe suku tenke sidadaun Timor-Leste, tinan 17 ba leten, hela iha suku ne’ebé partense ba, iha kartaun eleitorál ne’ebé hetan ona resensiamentu husi STAE no hetan apoiante pursentu ida husi totál eleitór ne’ebé hela iha suku refere.

Daudaun ne’e, CNE hala’o ona edukasaun sivíka faze dahuluk iha postu administrativu Fohorem, suku Dato-tolu, iha suku Taroman iha aldeia Mokous, aldeia Ai-toun iha suku Fatululik, postu administrativu Fatululik, suku Dato-rua, postu administrativu Fohorem, Suku Fatumea no Nanu, iha postu administrativu Fatumea no iha suku Lalawa, aldeia Ai-oan postu administrativu Tilomar.

Tuir planu CNE nian katak programa edukasaun sívika faze dahuluk  sei remata iha loron 12 fulan-setembru ne’ebé sei hala’o iha suku Matai, postu administrativu Tilomar, munisípiu Covalima.

Notísia Relevante :CNE abertura edukasaun sívika iha Pássabe prepara ba eleisaun suku

Jornalista: Celestina Teles

Editór:Agapito dos Santos

iklan
iklan

Leave a Reply

iklan
error: Content is protected !!