COVALIMA, 08 setembru 2023 (TATOLI)- Diretór Komisaun Nasionál Eleisaun (CNE, sigla portugés) munisípiu Covalima, Hermenezildo de Sena, hateten aplikante na’in 211 ne’ebé antes ne’e submete ona sira-nia dokumentu atu sai ofisiál supervizaun eleisaun iha hodi halo supervizaun iha eleisaun suku tinan ne’e sei tuir teste eskrita iha semana oin.
“Komisaun Nasionál ba Eleisaun simu rekrutamentu ba Ofisiál Supervizaun Suku (OSE) hamutuk 211 nune’e tersa semana oin ita sei fó teste eskrita ba kandidatu OSE ne’ebé submete dokumentu,” Hermenezildo de Sena hateten ba jornalista sira iha ninia servisu fatin tabakolot, sesta-ne’e.
Nia dehan, CNE sei rekruta hamutuk ema na’in 148 hosi total aplikante 211 hodi bá iha aldeia sira iha munisípiu Covalima bainhira realiza eleisaun suku no aldeia iha fulan-outubru.
Munisípiu Covalima iha ninia postu administrativu hamutuk hitu kompostu hosi Fatululik, Fatumea, Fohorem, Maucatar Tilomar, Suai no Zumalai ho ninia suku 30, aldeia 148.
Tuir dadus ne’ebé Agência Tatoli asesu husi Sekretáriu Tékniku Administrasaun Eleitóral (STAE) Covalima rejista totál votantes iha tinan 2023 hamutuk 49. 469.
Jornalista: Celestina Teles
Editór: Agapito dos Santos
