DILI, 11 setembru 2023 (TATOLI)—Conselho Imprensa de Timor-Leste (CI) Timor-Leste rekomenda ba ofisiál seniór sira iha Myanmar atu respeita no garante liberdade imprensa ba jornalista sira iha Myanmar.
Notísia Relevante: DDF 2023 promove liberdade imprensa no espresaun iha Sudeste Aziátiku
Prezidente Konsellu Imprensa, Otelio Ote, hateten rezultadu hosi Konferénsia Internasional Dili Dialogue Forum (DDF) no pozisaun Konsellu Imprensa nian nu’udar membru Rede Konsellu Imprensa Sudeste Aziatiku (SEAPC-Net) ne’ebé responde ba situasaun polítika atuál iha Myanmar liuliu iha área liberdade imprensa nian, rekomenda ba autoridade Myanmar gatrante Liberdade imprensa no espresaun.
“Semana rua liubá ami realiza DDF ne’ebé ami-nia parseiru sira hosi nasaun internasionál no rai-laran partisipa. Buat ida-ne’ebé ami konklui mak rekomendasaun ba Myanmar,” Prezidente Konsellu Imprensa, Otelio Ote, hateten iha konferénsia imprensa ida iha Gabinete Konsellu Imprensa. Quintal Boot, segunda ne’e.
Membru Konsellu Imprensa, Benevida C. Barros, hateten importante tebes ba Konsellu Imprensa atu hato’o ninia solidariedade ba situasaun liberdade imprensa iha Myanmar ne’ebé hetan ona intimidasaun, ameasa no kastigu hosi militár.
“Ita hato’o ami-nia preokupasaun kle’an ba mídia no maluk jornalista sira iha Myanmar, agora dadaun sira la hala’o atividade hanesan jornalista sira, balun muda ba Australia tanba presaun intensiva, intimidasaun no kapturasaun iha Myanmar ne’ebé ezije sira atu sai hosi sira-nia rai, ” nia dehan.
Informasaun sira-ne’e konfirma diretamente hosi Fundasaun Internasionál Jornalista Ofisial Komunikasaun Sosial Azia Pasifiku ne’ebé marka prezensa iha Dili Dialogue Forum (DDF) iha 01 setembru 2023.
Tanba ne’e, CI husu ba autoridade kompetente sira iha Myanmar atu respeita liberdade imprensa no liberdade espresaun iha Myanmar, nune’e mós jornalista sira hotu iha Myanmar iha nasaun sira seluk iha Azia atu nafatin defende direitu umanu.
Tuir publikasaun IFJ nian iha loron 31 fulan-maiu tinan 2023, relatóriu hosi Asosiasaun Asistensia ba Prizaun Politika (AAPP) Burma nian, to’o 30 fulan-maiu tinan 2023, pelumenus ema na’in-18,417 dadur hela iha Myanmar, na’in 6,106 hosi sira-ne’ebé hala’o hela sentensa. pelumenus jornalista na’in-176 mak hetan kapturasaun, ho oho na’in-haat (4) dezde okupasaun militár iha 01 fevereiru 2021, no ema na’in 47 mak sei hela iha prizaun ka iha prizaun polísia.
Tuir lista iha anuál IFJ nian ba tinan 2022, agora Myanmar nu’udar nasaun ne’ebé iha númeru jornalista ne’ebé aas liu hanesan segundu númeru mate ne’ebé aas liu iha mundu hafoin Xina.
Presaun internasionál iha 03 fulan-maiu, militár Myanmar nian hasai jornalista na’in-lima (5) iha amneistia umanitária hamutuk na’in-2,153 dadur sira.
IFJ kontinua husu ba governu atu hakat ba oin hasoru lideransa militár liuhosi meiu hotu-hotu ne’ebé bele, inklui uza lei atu fó sansaun ba violador direitus umanus internasionál sira iha rai-li’ur.
Jornalista : Osória Marques
Editór : Cancio Ximenes
