MALIANA, 11 setembru 2023 (TATOLI)-Diretór Eskola Ensiñu Sekundáriu Tékniku Vokasionál (ESTV) númeru II Malibaka Yamato, Lázaro de Jejus Santos, preokupa homovimentu iha areadór eskola iha oras aprendijazén, tanba laiha moru protesaun hodi fó impaktu ba prosesu aprendijazén.
“Loron-loron komunidade nia karau movimenta livre hodi estraga ai-oan no hafo’er ambiente eskola,” Diretór Lázaro informa ba Jornalista sira iha ninia servisu fatin segunda ne’e.
Notisia Relevante:Kompañia reabilita ona sala tolu ESJTV Malibaca
Nia hateten dezde mandatu diretór antigu to’o ohin loron sempre relata problema ne’e ba iha Ministériu Edukasaun Juventude no Desportu atu hari’i moru protesaun maibé laiha resposta to’o ohin ne’e, mezmu antes ne’e, iha ona moru protesaun maibé hetan estragus ona hosi dezastre naturál iha tinan hirak liubá.
Atu rezolve situasaun ne’e, durante ne’e eskola foti inisiativa hodi husu kontribuisaun hosi inan-aman estudante sira hodi sosa zinco no besi hodi taka provizóriumente maibe la seguru tanba karau nafatin movimentu iha oras eskola nian.
Iha parte seluk, Diretór eskola ne’e mós preokupa ko-nabá utilizasaun sala foun 13 ne’ebé maka antes ne’e hetan ona re-abilitasaun hosi Kompañia Elly Karya Unipesoál Lda, ho orsamentu $248.467.16 iha fulan-abríl liuba maibé to’o oras ne’e, seidauk utiliza hodi hala’o prosesu aprendijazén.
Obra ne’e inaugura simbolikamente hosi Eis Primeiru Ministru, Taur Matan Ruak, iha Ensinu Sekundáriu Jerál Dom Martinho da Costa Lopes Maliana, maibé to’o agora Ministériu Edukasaun Juventude no Desportu seidauk entrega ba eskola hodi utiliza ba prosesu aprendijazén.
“Plaka Eis primeiru Ministru asina tiha ona maibé ate a data seidauk entrega mai parte eskola nian, ha’u rasik hanesan diretór eskola ezije dala tolu ka ha’at ona ba ha’u-nia superiór diretór edukasaun munisipál maibé to’o ohin loron nia responde sei laiha, ha’u mós sei la hatene nia razaun tanba saida,” Nia haktuir.
Ho atrazu kona-ba utilizasaun sala foun ne’e, nia relata fó mós impaktu ba eskola ligadu ho falta bee moos. “Ami-nia saúde ijiéne ne’e araska oituan iha tempu bai-loron,tanba bee kompania fura tia ona, maibé ate a data la entrega entaun hariis fatin hirak ne’e ami garantia de’it ba bee hosi BTL,E.P, maibé to’o bai-loron hanesan ne’e forñese mós la to’o,” nia hateten.
Entretantu, ESTV númeru II Malibaka Yamato Maliana ho totál sala hamutuk 28, totál estudante 395 ho ninia profesór hamutuk na’in-28.
Notisia Relevante:Estudante 128 iha ESTV Malibaka Yamato tuir ezame PAP
Jornalista: Sergio da Cruz
Editór: Agapito dos Santos
