DILI, 11 setembru 2023 (TATOLI)—Prezidente Partidu Frente Revolsionáriu Timor-Leste Indepedente (FRETILIN), Francisco Guterres Lú Olo, reafirma iha aniversáriu transformasaun Asosiasaun Sosiál Demokrata Timorense (ASDT) ba partidu FRETILIN (11 setembru 1974-11 setembru 2023) ba dala-49 ne’e FRETILIN sei nafatin iha povu nia sorin no kontinua luta atu liberta povu Timor-Leste.
Notísia Relevante: FRETILIN selebra aniversáriu ba dala-48 ‘lori naroman bá povu’
Nia dehan, ohin 11 setembru 2023 data istóriku ba FRRTILIN, iha tinan 1974 to’o 2023 bandeira FRETILIN ninian hasa’e hasoru funu boot ida durante tinan 24 nia laran bandeira FRETILIN nanis kedas metin iha ninia mastro riin, hasoru mós dezáfiu oioin to’o ohin loron maibé bandeira FRETILIN metin nafatin iha ninia riin.
“Pasajen ASDT iha loron ida ne’e halo FRETILIN mosu ho nia konseitu klaru no programa polítiku, objetivu ida mais klaru mak indepedénsia totál Timor-Leste nian. Hosi ne’e mai oin to’o agora, nafatin FRETILIN mak hakarak duni indepedénsia ida ne’e. No, ohin 11 setembru 2023, ha’u mai reafirma fila-fali lori komite sentrál FRETILIN nia naran atu reafirma fila-fali dala ida tan ba militante ho kuadru FRETILIN nian no ba povu Timor-Leste tomak katak, FRETILIN sei iha nafatin povu maubere nia sorin no FRETILIN sei halo aliansa ho povu ida-ne’e atu kontinua luta liberta ita-nia povu,” Prezidente Partidu ne’e hateten ba jornalista sira lihusi konferénsia imprensa iha sede Komite Sentrál FRETILIN (CCF, sigla portugés), Comoro, segunda ne’e.
Tuir nia, prosesu dezenvolvimentu Timor-Leste FRETILIN nian haree katak ita Timor-Leste independente duni maibé prosesu dezenvolvimentu sei la’o ho difikuldade barak maibé iha kapasidade atu bele hala’o atividade, dezde hosi instituisaun sira-nia funsionamentu.
Dezde hosi programa ho planu atividade ba dezenvolvimentu nasionál nian, FRERTILIN sei la’o ho difikuldade barak, nune’e FRETILIN presiza hadi’a bele hametin di’ak liután Estadu direitu demokrátiku.
Enkuantu, antes to’o iha aniversáriu FRETILIN ba dala-49, partidu hala’o nia atividade hanesan doasaun raan no atividade sira seluk.
ASDT transforma ba FRETILIN
Frente Revolusinária Timor-Leste Independente (FRETILIN) hahú moris ho Asosiasaun Sosial Demokrata Timorense (ASDT) ne’ebé harii iha loron 20 fulan-maiu tinan-1974 no hafoin fulan tolu (3) eziste ASDT transforma kedas ba FRETILIN iha loron 11 setembru 1974.
FRETILIN eziste nu’udár resposta ba neseidade atu hamosu organizasaun ida ho karáterístika movimentu ka frente Libertasaun Nasional ida, ne’ebé lori responsabilidade boot atu lidera no lori povu Timor-Leste luta ba Ukun Rasik Aan no atu defende povu no País nia vida hasoru ameasa invazaun hosi rejime Indonesia, nune’e, FRETILIN mosu nu’udár movimentu nasionalista dahuluk iha Timor-Leste iha ámbitu no dezenvolvimentu polítika iha tinan-1974.
Jornalista : Nelson de Sousa
Editór : Cancio Ximenes
