DILI, 11 setembru 2023 (TATOLI)—Primeiru-Ministru (PM), Kay Rala Xanana Gusmão, segunda ne’e, atualiza preparasaun IX Governu Konstitusionál ba proposta Orsamentu Jerál Estadu (OJE) 2024 ba Prezidente Parlamentu Nasionál (PPN), Maria Fernanda Lay, no vise prezidente, Maria Terezinha Viegas no Sekretaria Meza PN, Bendita Moniz Magno.
Notísia Relevante: PN aprova proposta Orsamentu Retifikativu biliaun $1,7 iha finál globál
“Kalendáriu ba Orsamentu Jerál Estadu (OJE), mai informa ba Prezidente no Vise Prezidente katak aban (tersa (12 setembru 2023) iha edifísiu Ministériu Finansa (MF) sei simu ema hotu-hotu komesa diskute kona-ba OJE 2024,” Xefe Govetnu ne’e hateten ba jornalista sira hafoin ramata enkontru ho PPN iha Parlamentu Nasionál.
Governu liuhosi Ministériu Finansa, PM Xanana hateten, aban sei realiza jornada orsamentál ho semináriu marka inísiu preparasaun OJE 2024 ho nia tema “Kontinua Konsolida no Transforma Serbisu Prestasaun liuhosi Melloria Sistema Jestaun no Estratéjia Investimentu”.
Importánsia ba objetivu semináriu ne’e mak define prioridade Governu no estabelese tetu fiskál ba tinan oin, Jornada Orsamentál sei hetan inísiu ho diskursu abertura hosi Ministra Finansa, Santina José Rodrigues F. Viegas Cardoso, no Primeiru-Ministru, Kay Rala Xanana Gusmão.
Iha sesaun daruak, sei hamutuk atu diskute analiza ba situasaun makro-ekonómika, dezempeñu investimentu fundu petrolífeiru, informasaun kona-ba emprestimu, Parseria Públiku-Privadu (PPP), apoiu hosi doadór nian, dezenvolvimentu setór finanseiru iha kontestu konstrusaun Estadu nian no papel fundamentál Banku Nasionál Komérsiu Timór-Leste (BNCTL) iha dezenvolvimentu ekonomia nian.
Sesaun datoluk, sei dedika ba aprezentasaun prioridade ba mandatu IX Governu Konstitusionál, no sesaun ikus sei iha tempu diskusaun kona-ba prioridade no tetu fiskál tinan 2024, no enseramentu ho intervensaun hosi Primeiru-Ministru.
Eventu ne’e sei inklui partisipasaun hosi membru Governu hotu, reprezentante hosi ministériu hotu ajénsia autonómia, autoridade munisipál no sosiedade sivil.
Jornalista : Nelson de Sousa
Editór : Cancio Ximenes
