MALIANA,12 setembru 2023 (TATOLI)-Koordenadór Eletrisidade de Timor Leste, Empreza Públika (EDTL,E.P, sigla portugués), iha tempu badak sei instala liña eletrisidade ba komunidade uma-kain 118 iha aldeia Faturui, suku Leolima, postu administrativu Balibo munisípiu Bobonaro.
Koordenadór EDTL,E.P Munisípiu Bobonaro, Mário de Jesus relata foin lalais ne’e tékniku sira halo ona levantamentu dadus iha aldeia ne’ebá tanba ne’e sei halo instalasaun iha tempu badak.
Notisia Relevante:Abitante Faturui halerik ba infraestrutura bázika
“Nia tama iha pakote ikusliu, tinan ida ne’e bele instala ona ba aldeia Faturui ne’e bele tama iha projetu eletrifikasaun komunitária (PEK) bele mós projetu eletrifikasaun nasionál (PEN) tanba ita haree ba distánsia nia menus hosi killometru 5 ne’e komuntária mak sei servisu rasik,” Nia imforma ba jornalista sira iha ninia servisu fatin, segunda ne’e
Nia hateten populasaun iha postu administrativu Balibo maioria asesu ona eletrisidade ne’ebé maka forñese hosi EDTL maibé sei falta aldeia Bee-mean no Falouai iha suku Leohitu maka to’o daudaun ne’e seidauk asesu eletrisidade.
“Faluia ne’e, iha domingo oin mai hahú ona servisu komunitária entre tékniku EDTL ho komunidade servisu voluntáriu,” Koordenadór Mário de Jesus hateten.
Tuir dadus hosi servisu EDTL,EP munisípiu Bobonaro katak hosi totál suku 50 ne’ebé partense bai ha munisípiu ne’e, falta aldeia 21, aldeia 21 ida ne’e aldeia tolu hosi postu administrative Lolotoe, aldeia rua hosi postu administrativu Balibo no aldeia 16 hosi postu administrativu Bobonaro.
“Hau fiar katak governu ida ne’e sei kompleta tanba ami-nia dadus kompletu ona hein de’it atu loke konkursu liuhosi projetu komunitária ka projetu eletrifikasaun nasionál,” nia hateten.
Populasaun Munisípiu Bobonaro ne’ebé asesu ona enerjia elétrika hamutuk uma-kain 16.762.
Notísia Relevante:Uma-kain 1,662 iha Bobonaro seidauk asesu enérjia elétrika
Jornalista: Sergio da Cruz
Editór: Agapito dos Santos
