Uma-kain 1,662 iha Bobonaro seidauk asesu enérjia elétrika
MALIANA, 26 jullu 2023 (TATOLI)-Eletrisidade Timor-Leste, Empreza Públika (EDTL,E.P) Munisípiu Bobonaro, identifika uma-kain 1,662 seidauk asesu enerjía elétrika.
Koordenadór EDTL,E.P Munisípiu Bobonaro, Mário de Jesus, konfirma komunidade ne’ebé asesu ona enerjia elétrika hamutuk uma-kain 16,762.
Notísia Relevante:EDTL finaliza ona projetu liña eletrifikasaun komunitária tolu iha Bobonaro
“Ita iha suku tolu hanesan Genulai, Goulolo no parte Ilatlaun mak la asesu eletrisidade, ba uma-kain ne’ebé la asesu hamutuk 1,662, ba fali aldeia la asesu eletrisidade ne’e hamutuk 24 iha postu Cailaco, Lolotoe, Bobonaro no Balibó, só Maliana vila ho Atabae mak asesu hotu hotu,” Koordenadór EDTL munisípiu Bobonaro, Mário de Jesus, informa ba Jornalista sira, iha kna’ar-fatin, kuarta ne’e.
Maski nune’e Jerente ne’e konfirma, governu liuhosi Projetu Eletrifikasaun Nasionál (PEN) tinan 2022 instala ona enerjía elétrika foin lalais ne’e ba komunidade suku Leohitu, postu administrativu Balibó, no aldeia balu iha suku Guda, inklui ida ligasaun hosi área SMP2 suku Holsa ba suku Tapo-Memo.
Enkuantu projetu balu sei iha faze implementa mak hanesan iha aldeia Nunutana ba suku Raiheu, postu administrativu Cailaco, ida iha aldeia Pipgalak II, suku Tapo-Memo, no hosi Memu suku Saburai to’o alto Lebos, suku Gildapíl, postu administrativu Lolotoe.
“Saburai nian ita haree tama ona ba 40, maibé ita haree liña média tensaun ba Atus ne’e ita bele fó ahi ona, Saburai nia seidauk tama liña baixa tensaun de’it mós seidauk prontu hotu,” Mario konfirma.
Aldeia sira ne’e mak hanesan Subalesu, Tuana-Laran, suku Batugade, aldeia Surilaku, Bour, suku Leo-Lima, postu administrativu Balibó.
Iha postu administrativu Cailaco nia mak hanesan aldeia Pisularan, Lugululi no Tateluri no Asulaun.
Notisia relevante: EDTL sei troka poste elétrika tuan hosi Nunura to’o Lahomea
Jornalista: Sérgio da Cruz
Editór: Evaristo Soares Martins
