Alunu rihun 56-resin realiza ezame nasionál iha outubru

DILI, 13 setembru 2023 (TATOLI) – Estudante 9.^o no 12.^o anu hamutuk 56.498 iha territóriu sei realiza ezame nasionál iha outubru, informa Koordenadór Gabinete Avaliasaun Dezenvolvimentu Kurríkulu Nasionál, João Maupelu.

Tuir dadus husi Ministériu Edukasaun, husi totál alunu 56.498 ne’e – 29.100 husi ensinu báziku, 23.256 sekundáriu jerál no 4.142 eskola tékniku vokasionál.

Ministériu Edukasaun halo ona preparativu ba ezame ne’e, liuliu ba elaborasaun, verifikasaun no validasaun pontu ezame sira finaliza ona no daudaun halo ona impresaun.

“Ministériu Edukasaun promete katak sei kumpre oráriu ne’ebé termina ona ba impresaun nian mak sei finaliza iha 13 outubru, nune’e bele halo distribuisaun pontu ezame sira ne’e ba iha Edukasaun Munisipál sira atubele hala’o ezame tuir oráriu ne’ebé deside ona”, João Maupelu hatete iha Vila Verde, ohin.

Pontu ezame ne’ebé maka ministériu elabora ona ba ezame nasionál ne’e mak ba 9.^o anu iha dixiplina neen hanensa lingua tetun, portugeza no ingleza, matemátika, siénsia naturál no istória.

Ba estudante sekundáriu jerál no tékniku vokasionál iha dixiplina ualu mak língua tetun, portugeza no ingleza, matemátika, fízika, biolojia, kímika no siénsia teknolojia. Iha mós dixiplina ba ezame lokál nian mak hanesan siénsia sosiál umanidade, ekonomia, istória, jeografia no sosiolojia.

Ba ezame nasionál tinan ida ne’e, Ministra Edukasaun, Dulce de Jesus Soares, antes ne’e dehan hakarak halo preparasaun ida di’ak atu asegura kualidade ezame refere.

Tuir ministra, ezame nasionál maka sai eventu importante ida iha Ministériu Edukasaun, tanba ne’e tenke halo planu ida di’ak atu lori ezame ne’e la’o ho susesu.

Notísia relevante: Ministériu Edukasaun inklui dixiplina Tetun iha ezame nasionál

Jornalista: Tomé Amado 

Editora: Maria Auxiliadora