DILI, 13 setembru 2023 (TATOLI)—Ministru Petróleu no Rekursu Minerál, Francisco da Costa Monteiro, aprezenta projetu rezolusaun lima ba nomesaun jerente Empreza Públika (E.P) no Institutu Públiku (I.P) iha reuniaun Konsellu Ministru, ne’ebé hetan ona aprovasaun.
Liuhosi rezolusaun Governu, nomea Rui Maria Alves Soares, ba kargu Prezidente Konsellu Administrasaun no Prezidente Komisaun Ezekutivu Timor Gas no Petróleu, Empreza Públika (Timor GAP, E.P) ba mandatu tinan-haat.
“Hanesan empreza públika referénsia iha setór enerjétiku, Timor GAP hetan mandatu hodi jere investimentu Estadu iha setór petrolíferu no setór relevante sira tuir polítika ne’ebé define ona hosi Governu,” Ministru Prezidénsia Konsellu Ministru, Agio Pereira, hateten hafoin reuniaun ezekutivu, iha Palásiu Governu, kuarta ne’e.
Notísia relevante : Konsellu Ministru aprova orgánika ministériu hitu
Iha biban hanesan, Konsellu Ministru nomea José Manuel Gonçalves, ba kargu Prezidente Konsellu Administrasaun, ho inerénsia, Prezidente Komisaun Ezekutivu Murak Rai Timor, E.P, ba mandatu foun ho durasaun tinan-haat.
Murak Rai Timor, E.P hanesan empreza públika referénsia iha setór mineiru Timor-Leste, ne’ebé hetan mandatu atu atua interese Estadu iha setór mineiru, liuhosi realizasaun atividade minerál sira tuir polítika ne’ebé define ona hosi Governu.
Notísia relevante : Governu Aprova Dekretu Lei Atividade Kompañia Murak Rai Timor, SÁ
Aleinde ne’e, Konsellu Ministru nomea hikas, Gualdino do Carmo da Silva, ba kargu Prezidente Konsellu Diretivu Autoridade Nasionál Petróleu, Institutu Públiku (ANP, I.P) ba mandatu foun ida ho durasaun tinan-haat.
ANP nu’udar institutu públiku ho atribuisaun sira atu atua hanesan entidade reguladora setór no indústria petróleu, gás naturál no derivadu no setór relevante sira.
Rezolusaun Governu ne’e mós nomea Rafael Danilson Magno de Araújo, ba kargu Prezidente Konsellu Diretivu Autoridade Nasionál Minerál, Institutu Públiku (ANM, I.P) ba mandatu tinan-haat.
ANM hanesan institutu públiku ne’ebé ho ninia atribuisaun atu atua hanesan instituisaun reguladora ba setór rekursu minerál ho kumprimentu rigorozu ba dispozisaun ne’ebé prevee ona iha Kódigu Mineiru, iha kualkér lejizlasaun ka regulamentasaun ezistente ka futura ne’ebé regula setór rekursu minerál.
Ikus liu, Konsellu Ministru nomea Job Brites dos Santos, ba kargu Prezidente Konsellu Diretivu Institutu Jeosiénsia Timor-Leste, Institutu Públiku (IGTL, I.P, sigla portugés) ba mandatu tinan-haat.
IGTL nu’udár institutu públiku ida ho ninia misaun atu poténsia kriasaun no jestaun arkivu, produsaun, jestaun, armazenamentu no difuzaun informasaun jeolójika, inklui kona-ba rekursu petrolíferu, gás naturál no minerál sai hanesan baze serbisu prospesaun, peskiza no esplorasaun rekursu minerál nasionál.
Governu halo nomeasaun hirak ne’e tanba tau konsiderasaun ba entidade hirak ne’e ninia idoneidade, integridade, formasaun akadémika no profisionál, esperiénsia ba kargu superiór sira, kapasidade téknika iha jestaun ba setór espesífiku petróleu, gás no rekursu minerál, koñesimentu polítika no estratéjika ne’ebé relasiona ho setór sira ne’e, aleinde ne’e kompeténsia lideransa, kolaborasaun, pedagojia no motivasaun ekipa sira.
Ezekutivu konsidera karakterístika sira ne’ebé hatudu, esensiál ba dezempeñu sira-nia kargu iha instituisaun hirak ne’e iha kuadru servisu interese públiku, ne’ebé organizasaun sira ne’e dezempeña ba servisu Estadu.
Jornalista : Antónia Gusmão
Editora : Julia Chatarina
