Konsellu Ministru aprova orgánika ministériu hitu
DILI, 16 agostu 2023 (TATOLI)—Reuniaun Konsellu Ministru iha kuarta ne’e, aprova orgánika ministériu hitu, kompostu hosi Prezidénsia Konsellu Ministru, Ministériu Negósiu Estranjeiru no Kooperasaun, Ministériu Justisa, Ministériu Saúde, Ministériu Obra Públika, Ministériu Solidariedade Sosiál no Inkluzaun, no Ministériu Petróleu no Minerál.
“Orgánika ministériu hirak ne’e aprova ona iha Konsellu Ministru, ho ninia kompénsia sira,” Ministru Prezidénsia Konsellu Ministru, Agio Pereira, hateten hafoin reuniaun ezekutivu, iha Palásiu Governu, kuarta ne’e.
Governante ne’e esplika, Prezidénsia Konsellu Ministru maka departamentu sentrál Governu nian ne’ebé prezide hosi Primeiru-Ministru no hetan tulun hosi Ministru Prezidénsia Konsellu Ministru, ne’ebé responsável hodi fó apoiu ba Konsellu Ministru no membru Governu sira seluk ne’ebé integra iha Governu.
“Nune’e mós, atu promove koordenasaun interministeriál Governu nian, liuhosi ninia órgaun sira, hosi gabinete apoiu ida-idak no hosi asesoria, servisu integradu iha administrasaun direta Estadu nian no pesoa koletiva ne’ebé integra iha administrasaun indireta Estadu nian,” nia subliña.
Notísia relevante : Konsellu Ministru aprova orgánika ministériu tolu
Enkuantu, Ministériu Negósiu Estranjeiru no Kooperasaun maka departamentu governamentál ne’ebé responsável ba konsesaun, ezekusaun, koordenasaun no avaliasaun polítika ne’ebé define no aprova ona hosi Konsellu Ministru, ba área sira hosi polítika esterna no kooperasaun internasionál, funsaun konsulares no promosaun inklui defeza ba interese sidadaun timor-oan sira nian iha rai-li’ur.
Ministériu Justisa maka departamentu governamentál ne’ebé responsável ba konsesaun, ezekusaun, koordenasaun no avaliasaun polítika, ne’ebé define no aprova ona hosi Konsellu Ministru kona-ba área justisa, direitu no direitu umanu ba rai no propriedade.
Nune’e mós, Ministériu Saúde maka departamentu governamentál ne’ebé responsável ba konsesaun, ezekusaun, koordenasaun no avaliasaun polítika ne’ebé define no aprova ona hosi Konsellu Ministru ba área saúde no atividade farmaséutikas nian.
Ministériu Obra Públika maka departamentu governamentál ne’ebé responsável ba konsesaun, ezekusaun, koordenasaun no avaliasaun polítika ne’ebé define no aprova hosi Konsellu Ministru ba área obra públika, abitasaun, abastesimentu, distribuisaun no jestaun bee, saneamentu no eletrisidade inklui ezekusaun planeamentu urbanu no abitasaun nian.
Ministériu Solidariedade Sosiál no Inkluzaun maka departamentu governamentál ne’ebé responsável ba konsesaun, ezekusaun, koordenasaun no avaliasaun polítika, ne’ebé define no aprova ona hosi Konsellu Ministru, ba área seguransa sosiál, asisténsia sosiál no reinsersaun komunitária no inkluzaun sosiál.
Ikus liu, Ministériu Petróleu no Rekursu Minerál maka departamentu governamentál ne’ebé responsável ba konsesaun no ezekusaun polítika enerjétika no jestaun rekursu minerál inklui mina-rai, gás naturál no minerál sira seluk hanesan define ona iha lejizlasaun aplikável, ne’ebé aprova hosi Konsellu Ministru.
Aleinde ne’e, ministériu ne’e sei fó mós lisensiamentu no regulasaun ba atividade extrativa sira no atividade industriál benefisiasaun mina-rai no gás naturál, no minerál nian, inklui petrokímika no refinasaun, nune’e mós ba projetu idrojéniu no kaptura inklui utilizasaun karbonu nian (CCUS) iha rezervatóriu jeolójiku no kavidade salina.
Jornalista : Antónia Gusmão
Editora : Julia Chatarina
