DILI, 10 agostu 2023 (TATOLI)—Governu liuhosi reuniaun Konsellu Ministru (KM) estraordinária, kinta ne’e, aprova projetu dekretu-lei tolu kona-ba orgánika Ministériu Administrasaun Estatál (MAE), Ministériu Asuntu Kombatente Libertasaun Nasionál (MAKLN), no Ministériu Defeza (MD).
Proposta dekretu-lei tolu ne’e aprezenta hosi Ministru Administrasaun Estatál, Tomás do Rosário Cabral, Ministru Asuntu Kombatente no Libertasaun Nasionál, Gil da Costa Monteiro ‘Oan Soru’, no Ministru Defeza, Donaciano do Rosário da Costa Gomes.
“MAE maka departamentu governamentál ne’ebé responsável ba konsesaun ezekusaun, koordenasaun no avaliasaun polítika, ne’ebé define no aprova ona hosi Konsellu Ministru ba área podér lokál, desentralizasaun administrativa, apoiu ba organizasaun komunitária, promosaun dezenvolvimentu lokál, organizasaun no ezekusaun ba prosesu eleitorál no referendáriu, promosaun ijiene, organizasaun urbana, klasifikasaun no konservasaun dokumentu ofisiál ho valór istóriku,” refere nota ne’ebé Agência Tatoli asesu, hafoin reuniaun ezekutivu iha Palásiu Governu.
Notísia relevante : Konsellu Ministru aprova estrutura Orgánika IX Governu Konstitusionál
MAKLN maka departamentu governamentál ne’ebé responsável ba konsesaun, ezekusaun, koordenasaun no avaliasaun polítika, ne’ebé define no aprova ona hosi Konsellu Ministru ba asuntu antigu Kombatente Libertasaun Nasionál.
MD maka departamentu governamentál ne’ebé responsável ba konsesaun, ezekusaun, koordenasaun, avaliasaun polítika, ne’ebé define no aprova ona hosi Konsellu Ministru ba área defeza nasionál no kooperasaun militár.
Jornalista : Antónia Gusmão
Editora : Julia Chatarina
