iklan

NASIONÁL, KAPITÁL, POLÍTIKA

Administradór Dom Aleixo husu abitante hamamuk Tasi-Tolu

Administradór Dom Aleixo husu abitante hamamuk Tasi-Tolu

Kondisaun iha Masin Lidun, Lagoa Tasi-Tolu, segunda (19/04). Imajen TATOLI/António Gonçalves.

DILI, 14 setembru 2023 (TATOLI)–Administradór postu administrativu Dom Aleixo, munisípiu Dili, José de Jesus, husu nafatin ba abitante ne’ebé okupa área protejida Tasi-Tolu presiza iha konxiénsia no koordena ho autoridade komunitária no husik fatin ne’e mamuk, tanba Governu iha polítika no planu atu halo dezenvolvimentu ba fatin ne’ebá.

Notísia Relevante: Okupante Tasi Tolu Hetan Karta Deklarasaun Hosi Xefe Suku

Administradór postu administrativu Dom Aleixo, munisípiu Dili, José de Jesus. Imajen Tatoli/ Osória Marques.

“Husu ba abitante sira-ne’ebé okupa hela rai protejida atu uza konxiénsia no presiza koordena ho autoridade komunitária no autoridade kompetente, nune’e dixiplina iha sidade Dili inklui Tasi-Tolu ne’e. Pelumenus hatene tuir bá, ida-ne’ebé mak rai Estadu, fatin pretejida no fatin turizmu sira. Tanba iha ne’ebá, Governu planeia atu konstrui Hotel Paradise Estrela lima iha ne’ebá no sei halo haleu área ne’ebá hahú hosi Masin Lidun nian,” Administradór postu administrativu Dom Aleixo, José de Jesus, hateten ba Agência Tatoli iha Administrasaun Munisipál Dili, kinta ne’e.

Nia hateten, abitante hirak ne’e ulun-fatuk toos tanba ema avizu no hateten ba sira katak área protejida Tasi-Tolu ne’e proibi ba ema konstrui uma no fatin hodi hela bá, tanba área protejida ne’e sai hanesan sítiu istoriku no fatin turizmu ida.

Área protejida hanesan Tasi-Tolu, nia hateten, Estadu bandu atu abitante konstrui uma hodi hela bá, maibé saida mak hatudu no haree realidade populasaun laiha konxiénsia hodi halo baraka kiik-oan, no bainhira Governu la hasee mak neineik ba neineeik, hosi baraka ne’e sei konstrui fali uma permanente ida hodi hela bá.

Notísia Relevante: Tasi-Tolu zona protejida la’ós zona ba komunidade atu hela

“Maibé, autoridade munisípiu Dili kontinua observa no aviza. Iha-ne’eba ne’e ita haree kuaze nakonu, aldeia de’it okupa ona espasu hosi xefe família nian. Governu iha ona polítika atu kria kondisaun ba sira maibé ida-ne’e seidauk to’o, maibé kuandu nafatin la kontribui ba dezenvolvimentu ita-nia rain, la’ós loro-loron mak autoridade komunitária avizu hela de’it,” nia dehan.

Lagoa Tasi-Tolu nia furak bele sai potensia turistiku. Imajen/Foti husi google.

Tuir loloos, nia hateten, lagoa Tasi-Tolu hanesan zona protejida no fatin istórikuida  hodi prezerva istória ba parke nasionál nian, tanba fatin ne’e uluk Amu Papa João Paulo II prezide misa bainhira mai vizita Timor-Leste (=Timor Timur) iha tempu okupasaun Indonézia iha 12 outubru 1989, maibé komunidade falta konxiénsia no hahú harii uma iha área protejida refere.

“Ida-ne’e, ha’u proekupa tebes no husu atu labele hela iha fatin (Tasi-Tolu) ne’e, husik mamuk no Governu ida-ne’e bele halo dezenvolvimentu no sai fatin turizmu iha ita-nia rain,” nia hateten.

Notísia Relevante: DNTP Sei Toma Atensaun ba Okupante Zona Protezidu iha Lagoa Tasi Tolu

Jornalista : Osória Marques

Editór         : Cancio Ximenes

iklan
iklan

Leave a Reply

iklan
error: Content is protected !!