DILI, 14 setembru 2023 (TATOLI)—Primeiru-Ministru (PM) Kay Rala Xanana Gusmão, iha kuarta (13/09), despede atleta timor-oan na’in-58, ne’ebé sei reprezenta Timor-Leste partisipa jogu Asian Games 2023 ba dala-19 iha Hangzhou, Xina.
Atleta timor-oan na’in-58 kompostu hosi feto 24 fahe ba atleta ualu no ofisiál 16, enkuantu mane 34, ne’ebé mai hosi federasaun 10 kompostu hosi tenis kampu, atletizmu, taekwondo, karate-do, natasaun, federasaun tiru, boxe, federasaun halterofelizmu, badminton no vollyball praia.
PM Xanana dejeza susesu ba atleta hotu no kompromete sei dezenvolve desportu iha área hotu tanba konsidera desportu di’ak ba saúde no promove nasaun nia naran.
“Husu atu sira hotu tenke hatudu talentu ho profisionál. Sira fila mai responsável sira ne’ebé responsabiliza kada área desportu ninian buka took hodi komesa hanoin tanba tinan mai ne’e tenke haluan desportu tanba desportu di’ak ba saúde, ne’ebe atu dezenvolve desportu iha área hot hodi ba halo kompetisaun,” Xefe Governu hateten hafoin reuniaun semanál ho Xefe Estadu, iha Palásiu Prezidensiál, Bairru Pité, kinta ne’e.
Notísia relevante : Alteta timór-oan hosi modalidade hitu prepara kompete iha Sea Games
Xanana dehan, área desportu hotu tenke dezenvolve no moderniza, tantu iha klubu no seluk entre joven sira iha universidade, to’o sekundáriu, ne’ebe la’ós de’it iha Dili.
Xefe Governu enkoraja mós atleta sira atu tau an hanesan embaixadór desportu hodi kompete iha atividade desportu ho profionál hodi foti no hamoris imajen desportu Timor-Leste.
Tuir Xanana, jogu desportu saida de’it nu’udar atividade ida atu ema individuu bele hatudu ka promove ninia telentu no telékniku kompetetivu atubele profisionál liután iha jogu ida.
Atleta hirak ne’e sei arranka hosi Dili bá Hangzhou iha loron 16 setembru no fila hikas mai iha loron 08 outubru.
Jornalista : Antónia Gusmão
Editora : Julia Chatarina
