DILI, 14 setembru 2023 (TATOLI)—Konsellu Ministru (KM), kuarta ne’e, liuhosi reuniuan Konsellu Ministru aprova ona projetu Rezolusaun Governu ba fornesimentu ekipamentu rekolla rezíduu solidu no aterru kontroladu ekipamentu ba operasaun aterru kontroladu, iha ámbitu projetu jestaun rezíduu solidu urbanu nian iha Dili.
Notísia Relevante: Xefe Governu orienta MAE no autoridade lokál presta atensaun ba lixu iha kapitál
KM aprova projetu Rezolusaun Governu nian, ne’ebé aprezenta hosi Ministru Administrasaun Estatál, Tomas do Rosário Cabral, hodi halo manutensaun ba interrese públiku kontratuál Estadu nian iha ezekusaun kontratu públiku ho ref.ª ICB/036/MAE-2020, ne’ebé asina ona iha loron 16 fulan-fevereiru tinan 2022, ba fornesimentu ekipamentu rekolla rezíduu solidu nian no ekipamentu ba operasaun aterru kontroladu, iha ámbitu projetu jestaun rezíduu solidu urbanu nian iha Dili.
“Ho diploma ida-ne’e, Governu reafirma ninia kompromisu ho implementasaun Estratéjia Investimentu ba Jestaun Rezíduu Sólidu Urbanu nian iha Dili, hetan ona aprovasaun hosi Rezolusaun Governu nu. 32/2016, loron 5 fulan-outubru. Ne’e rekoñese katak iha interese públiku ba akizisaun rápida ekipamentu sira ne’ebé temi ona hodi implementa Estratéjia ne’e,” Ministru Prezidénsia Konsellu Ministru, Hermenegildo Augusto Cabral Pereira, hateten ba jornalista sira iha Palásiu Governu.
Governu deklara inválidu ba deklarasaun kona-ba inteerese kontratuál Estadu nian ne’ebé lakon relasiona ho kontratu públiku ho referénsia ICB/036/MAE-2023, tanba falta avizu hosi parte adjudikatória no laiha aplikasaun ba sansaun pekuniária ne’ebé prevee iha kondisaun jerál kontratu nian antes ninia rezolusaun.
Aleinde ne’e, afirma kontinuasaun interrese kontratuál Estadu nian iha kontratu públiku ho referénsia ICB/036/MAE-2023.
Rekoñese katak, prorrogasaun ba prazu vijénsia kontratu públiku ho referénsia ICB/036/MAE-2023 no alterasaun espesífikasaun téknika ba sasán balu ne’ebé sei fornese kontribui ba interesse públiku
Governu fó instrusaun ba Komisaun Nasionál Aprovizionamentu hodi halo alterasaun ba kontratu Nú. ICB/036/MAE-2023 hodi permite prorrogasaun ba ninia vijénsia to’o loron 29 fulan-fevereiru tinan 2024 no alterasaun ba espesifikasaun téknika ba sasán ne’ebé sei fornese, bainhira la afeta ba operasionalidade ekipamentu rekolla rezúduu sólidu no operasaun aterru nian.
MAE hetan instrusaun hodi asina alterasaun ba kontratu Nú. ICB/036/MAE-2023, hafoin prorrogasaun ba prazu validade nian no garantia ezekusaun kontratu to’o loron 29 fulan-fevereiru tinan 2024.
Notísia Relevante:
Jornalista : Osória Marques
Editór : Cancio Ximenes
