DILI, 08 marsu 2023 (TATOLI) – Primeiru-Ministru (PM), Taur Matan Ruak, fó ona orientasaun ba Ministériu Administrasaun Estatál (MAE) no autoridade lokál sira atu tau-atensaun ba lixu sira, liuliu iha sidade Dili hanesan sentru komérsiál.
Xefe Governu hato’o orientasaun ne’e ligadu ho aprezentasaun ne’ebé halo hosi Ministru Administrasaun Estatál, Miguel de Carvalho, iha reuniaun Konsellu Ministru, kona-ba jestaun lixu daudaun ne’e no futuru jestaun rezíduu sólidu urbanu nian ba munisípiu Dili.
“Ministru Estatál aprezenta ona pontu situasaun dezenvolvimentu estratéjia jestaun rezíduu sólidu urbanu munisípiu Dili nian, ne’ebé loron-loron prodús liuhosi tonelada 200, hodi ba soe iha lixu-fatin Tibar, iha Liquiçá”, Ministru Prezidénsia Konsellu Ministru, Fidélis Magalhães, afirma iha Palásiu Governu.
Governante ne’e dehan, lixu ne’e problema Governu tomak nian, tanba ne’e hosi parte MAE halo esforsu hotu para hetan lalais rezultadu ba iha kontratu sira ne’ebé manán-na’in sira hetan tiha no ba implementasaun sira.
Nune’e Ezekutivu hakarak apela ba sidadaun sira atu kontribui ba jestaun lixu, liuliu iha tasi-ibun tanba dala barak husik hela naklekar iha fatin sira ne’e.
“Ida ne’e lasignifika katak Governu latau importánsia hodi halo jestaun ba lixu, tanba ida ne’e maka halo aprezentasaun ida ne’e no ejize solusiona lalais, maibé husu mós sidadaun sira hotu atu kontribui reduz lixu iha fatin públiku”, nia realsa.
Notísia relevante: AMD sei koloka kaixote lixu 2,165 iha kapitál Dili
Jornalista: Antónia Gusmão
Editora: Maria Auxiliadora
