Komandu F-FDTL investiga oknum PM tiru karau komunidade nian iha Manufahi
DILI, 14 setembru 2023 (TATOLI) – Xefe Estadu Maiór Forsa Armada Tenente Jenerál Domingos Raul ‘’Falur Rate Laek’’, hatún ona despaisu ba diresaun atu halo investigasaun ba kazu ne’e.
“Ha’u simu ona informasaun ba kazu tiru karau, ohin mak ha’u despaixa ona ba Diresaun Justisa Komandu F-FDTL hodi halo investigasaun, apura verdade, sé halai ba prosesu disipliñar atu fó sansaun”, Falur hateten ba jornalista sira iha Unidade Polísia Militár Kintál Boot, ohin.
Nia esplika, relatóriu ba kazu ne’e, Komandu F-FDTL informa ona ba Prezidente Repúblika liuhosi Kaza Militár inklui Governu.
Tanba ne’e, Falur husu ba ema hotu atu hein de’it rezultadu prosesu investigasaun ba kazu ne’e.
“Ha’u seidauk simu informasaun katak ema sivíl mak haruka militár ba tiru komunidade nia karau. Ha’u simu ona informasaun ba kazu ne’e maibé sivil atu bolu fali militár, só prosesu investigasaun mak bele hatene”, nia afirma.
“Maibé kuandu buat ruma akontese no horsida investiga mak haree, komandante mak responsabiliza, se nia mak toma insiativu hodi foti kilat, komandante mak responsabliza, nune’e mós ba membru ida lori kilat ne’e, tanba kilat ne’e la’os fó arbiru”, nia haktuir.
Tuir nia, kilat ne’e normalmente membru ida uza ba halo misaun mak fó, ka atu ba postu destakamentu mak fó maibé to’o tempu tenke entrega fali.
Nia revela, Komandu F-FDTL iha meius atu kontrola arma kuandu kadetes ida atu tama F-FDTL, nia hatene regra hodi uza kilat.
“Agora saida mak ita halo, ha’u haruka ona komandante sira estabelese norma ba ezekusaun permanente (NEP) nu’udar norma kontrola arma sira”, katak.
Tanba ne’e, iha kada unidade ka kada postu, komandante sira mak tenke halo regra liuliu atu kontrola arma sira, tanba siénsia militár ne’e buat hotu hanorin ona oinsá uza arma.
Rekorda katak kazu ne’e akontese iha loron (10/9), sábadu foin lalais 04:20 magrugada, deskonfia iha oknum Polísia Militár uza kilat tiru komunidade nia karau iha fatin ne’ebá, nune’e komunidade sira iha fatin refere hetan no halo virál kedan iha rede facebook.
Notísia relevante : Movimentu Estudante no Juventude husu Komandu F-FDTL foti medida ba oknum PM tiru karau
Jornalista: Natalino Costa
Editór : Zezito Silva
