OÉ-CUSSE, 13 setembru 2023 (TATOLI – Autoridade Protesaun Sivil (APC, sigla portugés), Rejiaun Administrativa Espesial Oé-Cusse Ambeno (RAEOA), kuarta ne’e konvida parseiru sira mai hosi Organizasaun Naun Governamentál (ONG) lokál no internasionál halo avaliasaun ba progresu servisu durante 2023 hodi prepara planu ba 2024.
Notísia relevante: Protesaun Sivíl sei rekupera uma 26 iha Oé-Cusse
Komandante Protesaun Sivíl Oé-Cusse, Inspetór Xefe Polisía, Herman Metan, hateten, avaliasaun importante, atu hatene ezekusaun ba planu no progama sira-ne’ebé durante ne’e implementa ona iha Oé-Cusse, nune’e bele prepara di’ak liután iha 2024.
Tán ne’e, durante iha sesaun avaliasaun ne’e, parte Autoridade Protesaun Sivíl, konvida parseiru sira hotu maihosi Komiaun Jestaun ba Dezastre Naturál, ONG sira hanesan, OXFAM, CVTL, Caritas Austrália, WFP, WN, PRADET, CARE Internasionál no joven mai hosi suku.
“Tanba iha tinan kotuk Protesaun Sivíl implementa programa liuliu ba asuntu dezastre naturál, ita sempre kolabora ho parseiru lokál no internasionál sira no mós autoridade RAEOA, ne’ebé mak eziste iha RAEOA,” Herman Metan, ba jornalista sira iha Oé-Cusse.
“Enkontru avaliasaun ne’e importante atu haree fila-fali saida mak halo ona iha fulan kotuk, tanba ne’e ohin loron hanesan enkontru ba dahuluk hodi avalia hamutuk, nune’e atu ba oin, bele mellora serbisu di’ak liután, iha tinan 2024 nian,” nia hateten.
Xefi Gabeinete hosi Sekretáriu Rejioná ba Asuntu Edukasaun no Solidariedade Sosiál, Sigid Punef, agrdese ba ekipa Protesaun Sivíl iha Oé-Cusse, tanba bele realiza sesaun avaliasaun ne’e, hodi halibur hamutuk OGN lokál no internasional sira iha RAEOA.
“Ha’u hanoin enkontru ne’e importante atu halo avaliasaun ba servisu ne’ebé maka durante la’o hela, liuliu ekipa APC Oé-Cusse hamutuk ho parseiru hosi ONG lokál no internasionál sira durante ne’e apoiu ona ba komunidade, liuhosi advokasia, sosializasaun, ba komunidade sira, atu oinsa bele halo prevensaun bainhira hasoru dezastre iha sira-nia hela fatin,” nia orgullu
Iha biban ne’e, Komandante Operasaun PNTL Oé-Cusse, Inspetór Xefe Armando Pauf Sila, reprezenta komandu agradese ba kontribuisaun hosi Ofisiál Polísia Suku (OPS) sira iha baze.
“Ha’u orgullu tanba sira iha suku sai hanesan fonte mós ba protesaun sivíl, tanba durante ne’e bele koopera hamutuk ho ekipa APC, hamutuk ho pontu fokál, sira-ne’ebé kolokadu iha suku tanba kontribui liuhosi informasaun bainhira iha akontese dezastre ka problema iha suku sira,” nia katak.
Notísia relevante:SEPS konvida OPS-ONG introdús lideransa transformativu igualdade jéneru iha Oé-Cusse
Jornalista: Abílio Elo Nini
Editór: Evaristo Soares Martins
