VIQUEQUE, 14 setembru 2023 (TATOLI)—Autoridade Protesaun Sivíl (APC, sigla portugés) planeia ona iha loron 18 setembru atu distribui materiál konstrusaun ba vítima hamutuk 234 dezastre naturál ne’ebé akontese iha tinan ne’e, iha munisípiu Viqueque.
Tuir Inspetór Polísia Komandante Operasaun APC munisípiu Viqueque, Matias da Silva, desizaun distribuisaun ne’e bazeia ba orientasaun hosi nasionál.
“Ami halo verifikasaun vítima sira-nia uma-kain hamutuk 234 ne’ebé afetadu ba dezastre naturál hanesan anin sobu, rai halai no mota tama uma. Nune’e oráriu distribui fixu ona semana oin, ami atu distribui materiál ba vítima sira,” Matias da Silva, informa ba Agência Tatoli, iha ninia kanaar fatin, Sentru Evakuasaun, Beloi, kinta ne’e.
APC pasa ona lista benefisiáriu simu materiál ba postu administrativu lima hodi taka iha kada sede suku, nune’e vítima sira bele haree sira-nia dadus.
“Bainhira distribui materiál konstrusaun inklui orsamentu ba vítima sira tuir kategoria tolu no bainhira vítima sira simu, liu fulan-tolu ami sei ba konfirma sira uza duni materiál hodi hadi’a uma ka lae, ami sei haree dala-tolu maka vítima sira la halo, ami sei loke fali prosesu ba vítima sira-ne’ebé simu materiál,” nia akresenta.
Notísia relevante : APC Viqueque rejista uma-kain 46 afetadu dezastre naturál
Materiál no orsamentu ba vítima sira bazeia ba kategoria, tipu a’at totál sei simu semente 50, kalen 50, besi travesaun 50, besi halo argola 60, pregu no seluk tan inklui osan transporte $1.000, a’at naton sei simu materiál hanesan besi travesaun 50 ho orsamentu transporte $750 no a’at kma’an sei simu kalen 50 ho orsamentu transporte $600.
Tuir dadus, hosi uma-kain 234 iha Viqueque, postu Viqueque Vila iha uma-kain hamutuk 77 kategoria a’at totál 60, a’at naton ualu no a’at kma’an sia, Lacluta uma-kain 6 kategoria a’at totál lima no a’at naton ida, Uatucarbau iha uma-kain 44, kategoria a’at totál ida, a’at naton lima no a’at kma’an 38, Uatulari uma-kain 60 kategoria a’at totál 18, a’at naton 10 no a’at kma’an 32 no Ossu uma-kain 56 kategoria a’at totál 10, a’at naton 20 no a’at kma’an 26.
Distribuisaun materiál ne’e sei halo simultáneamente iha munisípiu Viqueque.
Jornalista : Vitorino Lopes da Costa
Editora : Julia Chatarina
