MALIANA, 15 outubru 2023 (TATOLI) – Diretór Ezekutivu Asosiasaun Halibur Defisiénsia Rejiaun Oeste (AHDRO), Sebastião de Fátima, husu ba Autoridade Munisípiu Bobonaro (AMB) atu konsidera asuntu defisiénsia iha Orsamentu Jerál Estadu (OJE) tinan fiskál 2024.
Diretór ezekutivu ne’e haktuir, ezisténsia AHDRO atu fó advokasia ba ema ho defisiénsia, liuliu ba sira-ne’ebé hela iha área remota ne’ebé susar atu asesu informasaun, edukasaun, saúde no seluk tán.
Maske AHDRO eziste ona dezde 10 agostu 2015, ho ninia sentru tolu iha Bobonaro, Covalima no Liquiçá, maibé to’o oras ne’e seidauk hetan apoia másimu hosi instituisaun ruma.
Diretór Sebastiao dehan, ema ho defisiénsia barak mak iha talentu ba múzika no arte, maibé laiha fasilidade ruma atu dezenvolve sira-nia kreatividade.
“Ami husu Prezidente Autoridade Munisípiu Bobonaro, sé bele iha 2024 tau mós orsamentu própriu ba asuntu defisiénsia, liu ba organizasaun sira-ne’ebé tau matan ba ema ho defisiénsia, ami bele halo atividade,” nia informa asuntu refere iha Maliana, sesta ne’e.
Nia rekomenda ba Prezidente Autoridade Munisípiu Bobonaro, Ernesto de Oliveira Barreto, atu halo karta akompañmentu ruma nune’e AHADRO distribui ba parseiru sira hodi husu apoia finanseira atubele komemora Loron Mundiál Ema ho Defisiénsia ne’ebé sei monu iha 03 dezembru.
“Kada tinan ami komemora tama sai postu, tinan ne’e ami mós hakarak komemora, ami halo hela preparasaun tinan ne’e monu iha postu administrativu Atabae, ami presiza ita-boot sira-nia apoia atu eventu ne’e bele la’o,” nia katak.
Nia dehan, durante Ema ho Defisiénsia hakarak halo movimentu ba mai fatin hotu, difikuldade ne’ebé sira hasoru iha Bobonaro mak maioria edifísiu no fasilidade públiku barak laiha asesibilidade.
“Ita hotu hatene katak iha Maliana ne’e hanesan kota ketiga maibé realidade haree estrada ne’e tinan ba tinan sai problema, entaun ami defisiensia sira la’o, ema ne’ebé kondús transporte públiku liuhosi ami-nia oin, balu komprende, balun la komprende, gás liu rai u’ut sa’e, ida-ne’e sai preokupasun mai ami,” nia katak.
Tuir dadus ne’ebé AHDRO rekolla iha munisípiu Bobonaro iha ema ho defisiénsia na’in-400, maibé barak mak seidauk rejista.
Enkuantu tuir dadus sensu uma ka’in 2015 hatudu ema ho defisiénsia iha Timor-Leste hamutuk 38.118.
Notisia relevante: Ekipa “Open the Books” halo advokásia ba orsamentu sensivél dezenvolve EhD
Jornalista : Sérgio da Cruz
Editór : Evaristo Soares Martins
