VIQUEQUE, 15 setembru 2023 (TATOLI)—Ekipa hosi Grupu Banku Mundiál ho akompañamentu hosi Autoridade munisípiu Viqueque halo ona observasaun ba rai konstrusaun ospitál munisípiu Viqueque iha área Buanurak ho medida ektare 9.
“Ohin, ekipa hosi Banku Mundiál mai Viqueque hodi ami bá direta haree rai ne’ebé abitante sira oferese ba munisípiu, ne’ebé lokaliza iha área Buanurak atu konstrui ospitál munisipál. Sira hakarak bá haree diretamente fatin hodi sira bele hatene tanba sira mak finansia projetu konstrusaun,” Administradór munisípiu Viqueque, Januário Soares ‘Bolly’, informa ba Agência Tatoli hafoin ramata vizita rai iha resintu edifísiu administrasaun, sesta ne’e.
Banku Mundiál hatuur rekezitu ida katak área konstrusaun tenke asesu estrada, eletrisidade, bee-moos no iha sertifikadu ba rai hafoin bele halo konstrusaun.
“Nune’e, empreza ne’ebé manán konkursu públiku loke dalan alternativu hosi Buanurak to’o suku Caraubalu, kehe ona durante loron-haat no besik ona rai ne’ebé ita-nia abitante sira oferese. Enkuantu bee-moos sei halo pedidu ba Bee Timor-Leste, Empreza Públika (BTL, E.P) no Eletrisidade de Timor Leste, Empreza Públika (EDTL, E.P), ne’e ha’u koordena ona responsável sira iha Viqueque no sira mós fó resposta pozitivu katak prontu atu kanaliza bee no eletrisidade. Enkuantu sertifikadu rai daudaun ami trata hela,” nia tenik.
Notísia relevante : Administrasaun Viqueque loke konkursu dalan foun liga ba futuru ospitál munisipál
Nia dehan, parte bee no eletrisidade daudaun hein hela prosesu, maibé Parte Banku Mundiál presiza iha dezeñu detalladu no asina akordu ho Ministériu Finansa hafoin implementa.
“Durasaun serbisu tinan-lima, tanba ne’e ami mós esforsu hodi prinxe rekezitu sira. Ami sei serbisu hamutuk ho diresaun sira iha minisípiu no Ministériu Saúde hodi haree ba prosesu sira-ne’e hodi relata ba Banku Mundiál. Kona-ba rai, ha’u hanoin laiha problema, ami sei trata dokumentu sertifikasaun nia hotu no ami entrega ba Ministériu Saúde inklui Banku Mundiál rasik,” nia subliña.
Iha fatin hanesan, Diretór Jerál Jestaun Projetu iha Ministériu Saúde, Victor Martins, relata, Ministériu Saúde hakarak halo konstrusaun ospitál iha munisípiu tolu hanesan Ermera, Lautém no Viqueque tenke la’o dala-ida, tanba ne’e tenke esfosu hodi labele liu tinan-lima.
“Ami nafatin prontu asegura projetu harii ospitál iha munisípiu tolu tenke implementa dala-ida. Projetu ne’e Banku Mundiál dehan labele liu tinan-lima. Tanba ne’e, ita tenke esforsu rezolve bee no eletrisidade hodi relata ba Banku Mundiál hodi hahú prosesu konstrusaun,” Diretór tenik.
Vizita ne’e partisipa hosi ekipa diresaun liña ministeriál iha munisípiu Viqueque, Autoridade lokál no ekipa hosi Banku Mundiál.
Jornalista : Vitorino Lopes da Costa
Editora : Julia Chatarina
