PPN husu deputadu lejistarura daneen deklara rikusoin
DILI, 15 setembru 2023 (TATOLI)—Prezidente Parlamentu Nasionál, Maria Fernanda Lay, husu no bolu atensaun ba bankada parlamentár sira atu haree ida-idak nia Deputadu deklara rikusoin ba Tribunál Rekursu (TR) tanba prazu ramata iha sesta (15 setembru 2023) ohin.
Notísia Relevante: TR husu deputadu sira kumpre prazu deklarasaun rikusoin iha 15 setembru
“Ida-ne’e, ohin, ha’u bolu atensaun ba bankada tanba iha akollamentu matéria ida tenke haree mak deklarasaun de beins, tanba tuir lei ne’ebé ami Parlamentu mak aprova. Agora, ita hakilar, hanoin ita tenke halo tuir lei ne’ebé ita aprova, hakarak altera iha futuru ita bele altera tanba bainhira iha inisiativa lei ne’e tama vigora ita hanoin laiha kondisaun atu bele halo prosesu,” Prezidente PN ne’e hateten ba jornalista sira hafoin reuniaun lidér bankada iha PN, sesta ne’e.
Nia la esplika kona-ba daudaun ne’e Deputadu iha lejislatura daneen ne’e na’in hira mak prienxe ona deklara rikuosin tanba ladún lembra.
“Ha’u la hatene, tanba ohin bolu atensaun kolaborasaun bankada ida-idak para haree nia Deputadu, tanba momentu ha’u fila (hosi rai-li’ur) sira hotu-hotu dehan seidauk, labele ansi lai. Ha’u dehan hosi akollamentu to’o agora, Deputadu sira fó prioridade liu ba fiskalizasaun la hatene ba saida, ami hein relatóriu,” nia dehan.
Tuir lei Medida Prevensaun Kombate Korrupsaun (MPKK) bainhira Deputadu sira la kumpre hala’o deklarasaun rikusoin mak sei iha sansaun.
“Ha’u fiar Prezidente Tribunál Rekursu hato’o ona iha intervensaun katak, bainhira laiha deklarasaun beins iha sansaun finanseiru ne’ebé Deputadu mós tenke selu, iha lejislatura anteriór iha, ne’ebé la’ós novidade foun,” nia hateten.
Antes ne’e, Prezidente Tribunál Rekursu, Deolindo dos Santos, hateten prazu ba Deputadu sira atu halo deklarasaun rikusoin to’o iha 15 setembru 2023.
Jornalista : Nelson de Sousa
Editór : Cancio Ximenes
