EKONOMIA

KUOFFKK-TL hakarak lori povu iha baze halo produsaun agríkola

KUOFFKK-TL hakarak lori povu iha baze halo produsaun agríkola

Natar iha área Komu-Oli iha suku Uani-Uma, postu Uatucarbau, munisípiu Viqueque. Imajen/Vitorino Lopes da Costa

Dili, 16 setembru 2023 (TATOLI)-Vise Primeiru-Ministru, Ministru Koordenadór Assuntos Sosiál no Ministru Desenvolvimentu Rural no Abitasaun Komunitária, Mariano Assanami Sabino, iha kinta (14/09), halo enkontru ho Konfederasaun Unidade Organizasaun Frente Kaixa Klandestina Timor-Leste (KUOFKK) hodi diskute asuntu dezenvolvimentu agríkola ho objetivu hasa’e produasaun iha rai-laran.

Iha biban ne’e, KUOFFKK-TL fó rekomendasaun ba IX Governu hodi reforsa ogranizasaun rezisténsia sira hodi bele lori filafali povu sira ba baze halo produsaun agríkola, pekuaria no ortikultura.

“Ko’alia kona-ba dezenvolvimentu ne’e hanesan palavra de orden klandestina sira nia hateten Liberta Pátria no Liberta Povu, ho sentidu liberta pátria ita alkansa ona, maibé liberta povu seidauk alkansa,” Prezidente KUOFKK-TL, Tadeo Sebastião Sarmento, hateten hafoin hala’o enkontru ho Vise Primeiru-Ministru iha Gabinete VPM, Palásiu Governu.

Ho nune’e, KUOFKK-TL hakarak konsolida filafali organizsaun rezisténsia sira bá halo produsaun agríkola hodi kumpre dever nu’udar ema rezisténsia sira-nian hodi hasa’e ekonomia, nune’e bele liberta povu hosi kiak no mukit.

Notísia relevante : CCI-TL hahú mobiliza emprezáriu investe iha setór agrikultura hodi hamenus importasaun

Organizasaun rezisténsia ne’e hahú ona atividade kooperativa kuda foremungu iha rai ektar hitu iha suku Wedaberek, postu administrativu Alas, munisípiu Manufahi, maibé foin kolleta to’o ektare tolu, enkuantu seluk seidauk.

Organizasaun ne’e ninia estrutura estabelese ona iha munisípiu neen, ho nia postu administrativu sira iha baze preparadu hodi hala’o ida-idak ninia serbisu hanesan halo atividade agrikultura no prepara fatin hakiak ikan. Tanba ne’e, organizasaun rezisténsia husu ba Governu fó apoia orsamentu ou ekipamentu hanesan tratór tanba haree rai potensiál produtivu sira kontinua abandonadu.

Iha okaziaun ne’e, Vise Primeiru-Ministru hateten, daudaun ne’e Governu sei foku ba programa prioridade loron 120 nian, nune’e bainhira remata sei koordena malu ho Ministériu Agrikultura hodi bele haree posibilidade tulun ba produsaun agríkola nian.

Ministru Asanami mós konsidera, organizasaun rezisténsia sira hanesan Governu nia parseiru di’ak, nune’e sei adjusta programa relevante sira hodi koordena ho ministériu tutela hodi haree no bele hetan atividade integradu.

Jornalista     : Hortencio Sanchez

Editora          : Julia Chatarina

iklan
iklan

Leave a Reply

iklan
error: Content is protected !!