DILI, 13 setembru 2023 (TATOLI)—Kámara Komérsiu no Indústria Timor-Leste (CCI-TL, sigla portugés) ho koordenasaun ministériu tutela hahú mobiliza emprezáriu lokál hodi investe iha setór agrikultura, nune’e bele hasa’e produsaun produtu iha rai-laran.
“Ami ho Ministériu Agrikultura koordena malu hela hodi haree ida-ne’e no book duni setór agrikultura. Iha tinan ne’e no tinan oin tenke hapara ona importasaun ne’ebé pelu menus iha kouta foos ne’e tenke diminui no hasa’e produsaun rai-laran atu joven sira barak filafali ba vida agrikultura,” Prezidente CCI-TL, Jorge Manuel de Araújo Serano, hateten bainhira partisipa iha serimónia tomada pose ba Governadór BCTL foun, iha resintu BCTL, Akait, kuarta ne’e.
Notísia relevante : Governu alerta ba negosiante labele halo espekulasaun presu foos
Nia dehan, bainhira hakarak dezenvolve agrikultura presiza haree agrikultura moderna, teknolojia a’as, ho indústria moderna hodi hasa’e produsaun iha rai-laran.
Emprezáriu nasionál ne’e apoia totalmente polítika IX Governu nian katak hakarak hapara foos importasaun no foku ba produsaun rai-laran.
“Desizaun ne’e ha’u apoia 100%, ha’u agora tun ba terrenu hodi ko’alia ho povu agrikultór sira hodi hasa’e produsaun iha rai-laran, ha’u dehan beibeik ona katak hahán mós ita sei hola ne’e, ita moe laiha, ita iha rai, bee no loron, falta tan saida,” Prezidente CCI-TL akresenta.
Nia mós konkorda ho polítika Governu hodi fó subsídiu ba povu agrikultór maibé tenke seletivu.
“Tenke haree ema ne’e agrikultór duni ka lae, durante ne’e moris agrikultór ka lae, no konsistente vida emprezariál ka lae. Ida-ne’e ami sei hamutuk ho Governu atu haree hodi selesiona, maibé CCI apoia implementasaun subsídiu ba agrikultór,” Jorge tenik.
Tanba ne’e, CCI hamutuk ho Governu planeia atu realiza projetu pilotu iha fatin barak, hanesan daudaun fatin ne’ebé bá vizita ona maka natar iha Vemasse, Laleia no Maliana.
Jornalista : Antónia Gusmão
Editora : Julia Chatarina
