ERMERA, 11 setembru 2023 (TATOLI)—Governu liuhosi Ministru Komérsiu no Indústria, Filipus Nino Pereira, alerta ba negosiante sira atu labele halo espekulasaun presu tanba daudaun ekipa iha terrenu monitoriza hela presu foos iha fatin hotu.
“Informasaun no dadus ne’ebé ami iha katak presu foos ne’ebé sai hosi empreza importadór sira normál hela, ezemplu foos kilograma 20 folin $13,50, kilograma 25 folin $15 to’o $16, maibé sira ne’ebé sosa tutan lori ba fa’an ne’e mak hasa’e folin, ne’ebé husu ba espekulante sira durante ne’e, ne’ebé hakarak halimar ho presu foos tenke kuidadu tanba ekipa hosi AIFAESA no ami mós envolve hodi tun direta hodi haree, karik iha manipulasaun ba presu ami sei foti medida,” Ministru Filipus hateten hafoin partisipa iha elaborasaun planu Sekretaria Estadu Kooperativa (SEKoop), iha salaun NCBA, Railaco, munisípiu Ermera, segunda ne’e.
Antes ne’e, Governu realiza reuniaun dala-haat ona ho empreza importadór foos no halo vizita ona sira-nia armazén hodi haree stock foos ne’ebé iha. Nune’e, bainhira identifika negosiante sira halo manipulasaun presu, maka sei aplika sansaun administrativa, todan liu maka taka kios ka loja, inklui aplika sansaun seluk ne’ebé prevee iha Kódigu Penál Timor-Leste.
Notísia relevante : Membru PN aseita Governu subsidia povu tanba folin foos sa’e
Ligadu ho presu foos ne’ebé daudaun sa’e, ministériu relevante sira kompostu hosi Ministériu Komérsiu no Indústria (MKI) rasik no Ministériu Finansa (MF) inklui entidade relevante sei halo esforsu ho orientasaun Primeiru-Ministru, Kay Rala Xanana Gusmão, atu buka solusaun.
“Haree ona stock iha armazém no kapasidade produsaun tinan ne’e. Medida seluk maka iha posibilidade ka lae bele halo importasaun atu bele rezerva ba fulan-neen oin mai,” governante ne’e tenik.
Aleinde ne’e, Governu hakarak hapara foos importasaun no iha tempu hanesan haree mós ba kapasidade produsaun.
“Hapara produtu importadu ho razaun ida haree mós ba kapasidade produsaun. Nune’e ita labele depende demais ba foos importasaun nian,” nia adianta.
Medida ne’ebé Governu sei estabelese hodi hasa’e produsaun rai-laran maka sei fó subsídiu ba povu agrikultór sira. Governu sei sosa foos ho kuantidade naton hodi asegura durante fulan-neen ba oin.
Jornalista : Antónia Gusmão
Editora : Julia Chatarina
