DILI, 06 Abríl 2026 (TATOLI)—Dirasaun Nasionál Transporte Terreste (DNTT) liuhusi Seksaun Manutensaun Sinál Tránzitu rejista motorista 472 mak komete infrasaun iha implementasaun sistema semáforu modernu.
Notísia Relevante: DNTT rejista motorista 360 komete infrasaun iha sistema semáforu modernu
Xefe Seksaun Manutensaun Sinál Tránzitu, João Eugénio da Silva, informa iha Janeiru to’o Abríl ne’e DNTT rejista infratór sira-ne’e maibé motorista balun mak mai selu ona bainhira sira mai trata dokumentu veíkulu nian, enkuantu seluk ne’ebé seidauk selu tanba seidauk mai trata sira-nia dokumentu veíkulu nian.
“Motorista sira-ne’ebé komete infrasaun barak liu iha sistema semáforu modernu Timor Plaza nia oin ho tipu sama zebra cros. Maske tinta zebra cros ladun moos ona, maibé ami-nia ekipa sempre fó avizu ba motorista sira liuhusi sistema ne’ebé instala iha semáforu,” Xefe Seksaun ne’e relata ba Agência Tatoli iha nia kna’ar fatin, Balide, ohin.
Enkuantu kona-ba tipu infrasaun nian mak hanesan sama zebra cros sei multa $30, transporte públiku tula pasajeiru liu kuantidade selu $45, motorista ne’ebé lauza kapasete sei multa $30.
“Infrasaun sira-ne’e la’ós kobre de’it husi ne’e maibé mós husi monitorizasaun ba motorizada elétriku, entaun iha fulan rua liubá ami konsege pasa revista (cek point) halo sensibilizasaun ba públiku tanba motorizada elétriku ne’e iha velosidade 50, entaun bandu ba labarik sira atu kondús. Signkfika hanesan motorizada, nune’e tenke uza kapasete no iha karta kondusaun, multa mínimu $15 maibé ba oin tenke aumenta montante tanba ami fó ona avizu,” nia hateten.
Nia hatutan, kona-ba projetu sistema semáforu modernu (trafic light) ne’e prosesu sei iha CNA, tanba uza osan fundu infraestrutura.
Entretantu, nia dehan, iha loron 14 Maiu ne’e materiál sei to’o ona iha Dili no iha loron 20 Maiu ba leten ne’e empreza Bandidu Qualidade sei hahú pinta ona zebra cros no markasaun dalan ho durasaun tempu fulan-neen.
“Kona-ba orsamentu ha’u seidauk bele relata agora, hein to’o lansamentu mak ha’u sei ko’alia kona-ba kustu, tanba sei bolu mós ADN mai haree materiál sira-ne’e,” nia informa.
DNTT sei revee lei foun ba movimentasaun kamioneta fuzu iha Dili
Nia hatutan, daudaun ne;e, DNTT sei revee lei foun ba movimentaaun kamioneta boot sirta sirkula iha sidade Dili.
“Ami agora halo hela lei foun ida ba movimentasaun kamioneta fuzu iha sidade Dili, maibé agora daudaun kamioneta sira la’o hela tuir oráriu hahú husi tuku 19h00-20h00 kalan tenke para, hafoin kontinua movimenta fali iha tuku 21h00-23h00 no kontinua halo operasaun fali iha tuku 12h00 to’o tuku 04h00 madrugada. Maibé para tiha pois kontinua fali movimentu durante orás ida de’it iha tuku 07h00 dadeer,” nia dehan.
Daudaun ne’e, DNTT planeia revee fali atu movimentasaun kamioneta boot sira bele halo operasaun de’it iha kalan, bainhira ezbosu ne’e aprova mak DNTT sei sensibiliza ba públiku no aplika koima ba infrasaun ho montante $45.
Notísia Relevante: Empreza Javis Teknologi hahú serbisu instalasaun ba semáforu modernu iha fatin haat
Jornalista : Alexandra da Costa
Editór : Cancio Ximenes
