iklan

EKONOMIA, HEADLINE

Empreza Javis Teknologi hahú serbisu instalasaun ba semáforu modernu iha fatin haat

Empreza Javis Teknologi hahú serbisu instalasaun ba semáforu modernu iha fatin haat

DNTT sei troka semáforu tuan ho modernu. Imajen/Tatoli

DILI, 21 Janeiru 2025 (TATOLI) – Empreza Javis Teknologi AlBarokah hahú halo serbisu ba instalasaun semáforu modernu haat iha área Timor Plaza oin, Palásiu Prezidensiál, Colmera no iha Ministériu Justisa nia oin iha Caicoli.

Diretór Nasionál Aprovizionamentu, Ministériu Transporte no Komunikasaun (MTK), Pascoal Couto de Jesus, haktuir katak, antes ne’e, instalasaun ba semáforu modernu foun ne’e halo de’it iha fatin tolu iha Dili, ne’ebé aloka orsamentu hamutuk rihun $800. Maibé, hafoin verifikasaun ba planta no kadernu enkargu (BoQ, sigla inglés) husi Ajénsia Dezenvolvimentu Nasionál (ADN) deside monta iha fatin haat ho kustu $748.557,28.

DNTT sei troka semáforu tuan ho modernu. Imajen/Tatoli

Dirijente ne’e dehan MTK halo ona kontratu, iha 09 Outubru 2024, ho empreza PT. Javis Teknologi AlBarokah no daudaun hahú ona halo serbisu no nia progresu atinje ona 34%. Tuir planu, sei finaliza iha Abríl 2025.

“Daudaun ne’e, husi parte DNTT hamutuk ho enjeñeiru sira, kalan-kalan iha terrenu no ke’e ona fatin atu halo instalasaun ba semáforu ne’e rasik no hein harii ai-riin ba semáforu ne’e. Kompañia rasik mós daudaun book ona sentru ba CCTV room iha DNTT, nune’e bainhira ramata ekipa sei kontrola husi CCTV iha DNTT”, Pascoal Couto de Jesus informa ba Tatoli, ohin.

Nia esplika mós katak semáforu modernu haat ne’e sei tau hotu CCTV no mikrofone ho objetivu ba futuru atu kontrola veíkulu sira ne’ebé para la tuir nia regra no sistema bele akapta no sei fó informasaun bainhira transporte sira kontra regra, nune’e fó multa ba sira.

Iha sorin seluk, Jerente Projetu husi PT. Javis Teknologi Albarokah, Hendrit, admite katak instalasaun ba semáforu ne’e sei ramata iha Abríl.

“Implementasaun projetu iha terrenu daudaun ita ke’e rai-ku’ak atu harri fondasi ba ai-riin semáforu nian, daudaun ita bele dehan atinje ona 34% tanba sasán iha hotu ona. Bainhira ai-riin harii ona hein monta de’it”, nia salienta.

Aleinde ne’e, MTK mós kontrata empreza Cyrus Lda ho orsamentu rihun $96-resin  hodi halo instalasaun semáforu ba ema ho defisiénsia sira iha fatin públiku hamutuk lima.

Diretór empreza Cyrus Lda, Ruyi Martins, hateten serbisu instalasaun ba semáforu ba ema ho defisiénsia ne’e tuir kontratu sei ramata iha Abríl no fatin ne’ebé sei monta ne’e mak iha Palásiu Governu nia oin, Fatuhada, Kintál Boot iha Polísia Militár nia oin, Caicoli iha Ministériu Solidaridade Sosiál no Inkluzaun (MSSI) nia oin no BNCTL iha Obrigado Barrack.

Notísia relevante: Estabelesimentu semáforu modernu foun tolu iha prosesu aprovizionamentu

Jornalista: Arminda Fonseca

Editora: Maria Auxiliadora

iklan
iklan

Leave a Reply

iklan
error: Content is protected !!