DILI, 03 maiu 2024 (TATOLI)—Ministériu Transporte no Komunikasaun (MTK) liuhusi Diresaun Nasionál Transporte Terrestre (DNTT) tinan ne’e atu harii semáforu modernu tolu iha kapitál Dili.
“Ita-nia planu monta semáforu modernu foun tolu ne’e iha kapitál daudaun iha ona prosesu aprovizionamentu, ne’ebé hein de’it sei estabelese iha tinan ne’e,” Xefe Departamentu Sekretariadu Apoiu Tékniku Administrasaun DNTT, Nelson Sequeira Martins, informa ba Agência Tatoli, iha ninia knaar fatin, DNTT, Balide, sesta ne’e.
Notísia relevante : MTK sei estabelese semáforu modernu foun tolu iha kapitál Dili
Semáforu tolu ne’ebé sei monta iha kapitál Dili, iha parte Timor Plaza oin, rotunda Francisco Xavier Merkadu Lama no Colmera, maibé hafoin tékniku sira halo levantamentu dadus mak haree didi’ak atu halo mudansa ba fatin balun, hanesan iha Líder ka Timor Plaza, Aitarak-laran no iha Colmera Jardin 05 de Maio.
“Semáforu modernu tolu ne’e bainhira monta sei tau hotu CCTV no mikrofone ho objetivu ba futuru atu kontrola veíkulu sira ne’ebé para la tuir nia regra, sistema akapta no sei fó informasaun veíkulu kontra regra nia xapa matríkula, nune’e ita fó multa ba nia,” nia akresenta.
Bazeia ba orientasaun husi MTK ba DNTT, tinan ne’e estabelese uluk iha fatin tolu, nune’e bainhira susesu iha futuru mak sei monta tan iha kapitál Dili.
Totál orsamentu atu estabelese semáforu foun tolu ne’e hamutuk $800.000.
Aleinde ne’e, DNTT planeia ona atu hadi’a semáforu iha Bidau no Audian iha tinan oin.
“Ita-nia ekipa téknika halo ona esforsu hadi’a semáforu ne’ebé daudaun avaria iha kapitál Dili laran, liu-liu iha Katedrál nian ne’e di’ak ona maibé rua seluk hanesan iha Bidau bá ospitál nian ne’e no Audian iha antigu loja Bukit Bintang nia sorin atu bá Kuluhun ne’e sei halo manutensaun iha tinan oin tanba momentu empreza sira halo estrada ne’e estraga hotu fiu sira, ida-ne’e presiza osan mak halo manutensaun, entaun ita prevee ba tinan oin mak halo manutensaun,” Xefe Departamentu Nelson Sequeira, informa.
Semáforu iha kapitál Dili hamutuk 12 iha Colmera, Palásiu Governu, Timor Plaza, Katedral no seluk tan.
Ministériu Transporte no Komunikasaun (MTK) liuhusi Diresaun Nasionál Transporte Terrestre (DNTT), agostu tinan ne’e sei finaliza semáforu modernu foun tolu iha kapitál Dili.
Jornalista : Arminda Fonseca
Editora : Julia Chatarina
