DILI, 19 janeiru 2024 (TATOLI)—Ministériu Transpoorte no Komunikasaun (MTK) liuhosi Diresaun Nasionál Transporte Terrestre (DNTT) sei estabelese semáforu modernu foun tolu iha kapitál Dili, iha tinan ne’e nia laran.
“Ita-nia planu prioridade ida iha tinan ne’e mak sei harii semáforu modernu foun tolu iha kapitál Dili,” Xefe Departamentu Sekretariadu Apoiu Tékniku Administrasaun DNTT, Nelson Sequeira Martins, informa ba Agência Tatoli, iha ninia knaar fatin, DNTT, Balide, sesta ne’e.
Notísia relevante : DNTT sei halo inskrisaun ba motorizada ne’ebé seidauk iha dokumentu
Tuir planu, semáforu tolu ne’ebé sei monta iha kapitál Dili iha parte Timor Plaza oin, rotunda Francisco Xavier Merkadu Lama no Colmera.
“Semáforu modernu tolu ne’e bainhira monta sei tau hotu CCTV no mikrofone ho objetivu ba futuru atu kontrola veíkulu sira ne’ebé para la tuir nia regra, sistema akapta no sei fó informasaun veíkulu kontra regra nia xapa matríkula, nune’e ita fó multa ba nia,” nia akresenta.
Daudaun ne’e ekipa téknika sira halo hela levantamentu dadus iha terrenu, nune’e bainhira ramata sei implementa.
“Orientasaun ne’ebé ami hetan hosi Ministru Transporte no Komunikasaun maka ita koko uluk estabelese iha fatin tolu ne’e, bainhira susesu, iha futuru sei monta barak tan iha kapitál Dili,” nia tenik.
Totál orsamentu estabelese semáforu foun tolu ne’e hamutuk $800.000.
Jornalista : Arminda Fonseca
Editora : Julia Chatarina
