OÉ-CUSSE, 11 janeiru 2024 (TATOLI) – Diresaun Nasionál Transporte Terrestre (DNTT), sei halo inskrisaun ba motorizada Iegál sira , nune’e bele asesu dokumentu transporte nian maibé sei implementa ho rekizitu.
“Ba oin ami sei tenta buka solusaun oinsa atubele rezolve motorizada sira-ne’ebé laiha dokumentu, hanesan mós iha munisipíu Bobonaro, Covalima, no munisipíu sira seluk, agora daudaun ne’e iha ona orientasaun ba iha munisipíu sira, atu halo inskrisaun,” Diretora Nasionál Transporte Terrestre, Maria Antónia Victor, ko’alia iha iha ámbitu sensibiliza utilizasaun sinál tránzitu iha Oé-Cusse, kinta ne’e.
Notísia relevante: DNTT sensibiliza sinál tránzitu iha Oé-Cusse, atu hametin disiplina no prevene asidente
Maria Antónia Victor, informa, iha Oé-Cusse, motorizada kuaze 300 maka seidauk iha dokumentu, inklui balu iha munisipíu Bobonaro no munisipíu seluk-tán tanba tama ilegalmente liuhosi fronteira, presiza rezolve.
“Ha’u hanoin ida-ne’e ita sei halo koordenasaun, durante ne’e ami ho RAEOA seidauk halo koordenasaun kona-bá motorizada sira-ne’ebé tama ilegál laiha dokumentu, nune’e, ita bele hatene nia volume ne’e hira, depois ami DNTT la’os mesak, maibé ami sei koordena ho parte Alfándega, no komérsiu atu haree ba kestaun ida-ne’e,” nia promete.
Tuir nia, razaun tanba komunidade sira uza tinan barak ona, iha teritóriu Timor-Leste, nune’e Governu liuhosi DNTT sei haree atu fó solusaun.
“Intensaun tanba motorizada sira-ne’e tama ilegál ona, agora ita-nia komunidade sira uza tiha ona tinan barak, agora oinsá ita buka solusaun, atu rezolve ba iha asuntu ida-ne’e, sei asesu ba dokumentu maibé sei iha rekizitu,” nia katak.
Notísia relevante: DNTT prodús blanku transporte hamutuk 44.000 iha tinan 2023
Jornalista: Abílio Elo Nini
Editor: Evaristo Soares Martins
