COVALIMA, 16 setembru 2023 (TATOLI)—Polísia Nasionál Timor-Leste (PNTL) munisípiu Covalima rejista kazu kontra bandu a’as durante fulan-tolu nia laran, iha fulan-jullu to’o setembru tinan ne’e.
“Kazu hirak ne’e mak hanesan importa motorizada no hatama sigaru ilegál,” Komandante PNTL munisípiu Covalima, Superintendente Polísia Calisto Gonzaga, informa ba Agência Tatoli, iha ninia knaar fatin, Santa Rosa, sábadu ne’e.
PNTL halo apreensaun ba motoridaza ilegál sia hosi sidadaun na’in-haat, sindikatu negósiu sigarru ilegál iha postu Maucatar, Tilomar no Fohorem no iha sesta (15/09) halo apeensaun karreta tronton rua ne’ebé importa sasán kontra bandu liuhosi fronteira mota masin.
“Foin asume kargu hanesan Komandante PNTL munisípiu Covalima, fulan-tolu bazeia ba estudu sindikatu deskobre ema hatama sasán ilegál ho organizadu tanba timor-oan balun kontaktu sira-nia kolega hosi Indonézia atu sosa no timor-oan ne’e foti iha fronteira,” nia akresenta.
Notísia relevante : PNTL Covalima halo apreensaun ba sidadaun na’in-haat hatama sigaru ilegál
Nune’e, sidadaun sira simu sasán ilegál hosi Indonézia, bainhira sira haree tempu ne’ebé Polísia sira folga oitoan maka sira mós bá merkadu fa’an no distribui ba kolega sira seluk ne’ebé iha kios ka loja kiik hodi fa’an no hotu lalais.
“Ha’u sei la tolera kualker sé de’it, importante ha’u husu kompreensaun komunidade iha fronteira tenke kuida ho ita-nia Estadu ne’ebé dezevolve hela ita, iha autoridade hotu-hotu responsável ba área terrestre,” nia tenik.
Komandante ne’e fó atensaun ba sidadaun ne’ebé iha intensaun atu mobiliza sasán kontra bandu tanba sei la tolera kualker medida kontra bandu.
“Ita hanesan sidadaun, iha risku, ha’u dehan beibeik munisípiu seluk seidauk iha auto estrada, sé mak atu garante ita tama ho atividade halo negósiu sigarru ilegál. Ita iha mina agora atu explora, di’ak liu husik atividade kontra bandu, mai ita prepara ita-nia an tuir formasaun,” Superintendente Polísia Calisto Gonzaga fó hanoin.
Antes ne’e, iha loron 12 setembru, PNTL Covalima detein sidadaun haat (SM, OG, MB no LA) ho motorizada haat, ne’ebé tula sigarru ilegál.
Jornalista : Celestina Teles
Editora : Julia Chatarina
