COVALIMA, 12 setembru 2023 (TATOLI)–Polísia Nasionál Timor-Leste (PNTL) munisípiu Covalima halo apreensaun ba sidadaun nain haat hosi aldeia Lela, suku Holpilat, postu administrativu Maucatar ne’ebé uza motorizada tula sigaru ilegál lori tama iha Covalima liuhosi dalan ilegál.
Notísia Relevante: PNTL Covalima halo apreensaun ba sidadaun hatama sigaru liuhosi fronteira
Komandante PNTL munisípiu Covalima, Superintendente Calisto Gonzaga, hateten PNTL Covalima halo apreensaun ba sidadaun na’in-haat bainhira hala’o operasaun ne’ebé lidera hosi komandante rasik iha bairru Fatulor, suku Ogues, postu administrativu Maucatar, munisípiu Covalima.
“Ohin madrugada, ita konsege halo apreensaun ba sidadaun na’in-haat ne’ebé ho motorizada tula sasán kontra bandu hanesan sosa sigaru hosi ema Indonéziu lori mai iha postu Suai atu ba faan iha merkadu,” Superintendente Calisto Gonzaga hateten ba jornalista sira, iha nia kna’ar fatin, Santa Rosa, tersa ne’e.
Sidadaun na’in-haat ho motorizada haat tula sigarru ho marka ka tipu sira hanesan Orbit, Marlboro, Joker, Gudang Garam ne’ebé sura ba osan hamutuk $4000-resin.
“Ita halibur ona evidénsia hanesan motor haat, telefone haat ho nia kolega na’in-rua ne’ebé prontu atu faan hanesan na’in-ida faan iha merkadu Debos no na’in-ida faan iha suku Beco,” nia dehan.
Kamandante mós husu ba sidadaun sira hela iha fronteira labele sosa sasán kontra bandu ho dalan ilegál iha fronteira hanesan sigaru, arma, motorizada no karreta tanba bainhira PNT: halo apreensaun mak sei prejúdika no hetan sansaun.
Motizada haat ne’ebé tula sigaru ne’e ho nia xapa mátrikula sira hanesan motorizada Revo K5413, Revo ho xapa mátríkula J7710, motor Supra X ho xapa mátrikula D1061 ne’ebé iha dokumentu kompletu no motorizada Verza laiha xapa mátrikula no laiha dokumentu.
Suspetiu ho naran inisiál SM ne’e envolve iha tipu krime kazu kontra bandu ho Nuc. 0018/23.CV.MCT, lori sigarru DJ San Sum Koor kinur Ball tolu (3) ho slop 60 no sigaru DJ San Sum koor metan ball ida (1) no slop 20.
Suspeitu ho naran inisiál OG ne’e envolve iha tipu krime kazu kontra bandu ho Nuc. 0018/23.CV.MCT, lori sigaru Surya ne’e iha Ball ida (1) ho slop 20 no sigarru Orbit ne’e iha Ball tolu (3) no slop 62.
Suspeitu ho naran inisiál MB ne’e envolve iha tipu krime kazu kontra bandu ho Nuc 0018/23.CV.MCT, lori sigaru Surya ne’e ball ida (1) no slop 20, sigaru Orbit ne’e ball ida (1) ho slop 20 no tabaku Joker metan ne’e bantal 22.
Suspeitu ho naran inisiál LA ne’e, lori Sigaru Marlboro mean ne’e ball ida (1) ho slop 20, sigaru Marlboro mutin ne’e iha ball ida (1) ho slop 20, sigaru Marlboro metan ne’e iha ball ida (1) no slop 20.
Jornalista : Celestina Teles
Editór : Cancio Ximenes
