iklan

COVALIMA

FNBTL realiza formasaun prevene violénsia bazeia ba jéneru iha desportu ba estudante

FNBTL realiza formasaun prevene violénsia bazeia ba jéneru iha desportu ba estudante

Estudante nivél ensinu Sekundáriu tuir Formasaun torneiu basketból, defende joga no respeitu tane aas igualdade Jéneru. Imajen Tatoli/Celestina Teles.

COVALIMA, 18 setembru 2023 (TATOLI)–Federasaun Nasionál Basketból Timor-Leste  (FNBTL) hamutuk ho Organizasaun Internasionál UN Woman, realiza formasaun prevene violénsia bazeia ba jéneru iha desportu ba estudante nivél ensinu sekundáriu iha munisípiu Covalima.

“Eventu ohin ita fó formasaun kona-ba prevensaun atleta basketból hosi asedíu seksuál, promove papél jéneru ne’ebé sei hala’o durante loron rua ba estudante nivél ensinu sekundáriu no sei kontinua torneiu igualdade ba jéneru,” Sekretáriu Jerál Federasaun Nasionál Basketból Timor-Leste   informa ba jornalista-sira, iha salaun eskola sekundáriu jerál, segunda-ne’e.

Formasaun ba estudante ensinu nivél ensinu sekundáriu hodi integra atividade igualdade jéneru ba desportu, no atividade ne’e akontese tanba iha kooperasaun ho Federasaun Nasionál Basketból Timor-Leste ho UN Women ne’ebé apoau finanseira hosi Koica.

“Formasaun asuntu tane aas iguáldade jéneru, tanba estudante sira mak futuru ba nasaun ita hahú ho sira ita iha sosiedade ida konsensializadu kona-ba programa jéneru nian,” nia hateten.

Hafoin finaliza formasaun ba estudante nivél ensinu sekundáriu sei kontinua hala’o atividade basketból ba estudante nivél ensinu sekundáriu iha munisípiu Covalima.

“Ami introdús dixiplina basketból bolu tree ex tree basket ból diferensa ho jogu basketból lima (5) kontra lima (5) maibé agora tolu (3) kontra tolu (3), modalidade foun ho totál atleta ekipa ida na’in-haat (4),” nia hateten.

Federasaun Nasionál Basketból Timor-Leste hamutuk UN Women hala’o atividade formasaun no desportu basketból implementa projetu pilotu ho durasaun tinan ida, hahú implementa fulan-dezembru tinan kotuk sei finaliza iha fulan-dezembru tinan ne’e.

“Organizasaun UN Women apoia programa ne’e provizóriu, ita hein ida-ne’e ba oin,” nia dehan.

Reprezentante Estudante, Pascoela Acnes Cardoso Soares, sente kontente bainhira tuir formasaun hodi aumenta koñesimentu kona-ba direitu umanu, dever, direitu no igualdade jéneru

“Ami tuir formasaun hodi apreende kona-ba direitu umanu ita ema ida-ida iha direitu no dever, hanesan estudante iha direitu atu ba eskola no diferensa entre igualdade jéneru,” nia hateten.

Formasaun ne’e partisipa hosi Estudante Ensinu nivél sekundáriu hosi Eskola Café, Eskola Sekundáriu Ave Maria Suai, eskola sekundáriu jerál públiku Suai no eskola sekundáriu tekniku vokasionál Cristál Covalima.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!