iklan

EKONOMIA

Governu realiza hikas negosiasaun dezenvolvimentu Greater Sunrise iha fulan-outubru

Governu realiza hikas negosiasaun dezenvolvimentu Greater Sunrise iha fulan-outubru

Ministru Petróleu no Rekursu Minerál, Francisco da Costa Monteiro, dada-lia ho ho ekipa hosi Empreza Woodside Energy hafoin halo enkontru iha Gabinete MPRM, Farol, segunda (18/09/2024). Imajen Tatoli/António Daciparu

DILI, 18 setembru 2023 (TATOLI)–Ministru Petróleu no Rekursu Minerál, Francisco da Costa Monteiro, informa, Governu hamutuk ho konsórsiu projetu Greater Sunrise sira sei realiza hikas prosesu negosiasaun ba konseitu dezenvolvimentu kampu petrolíferu.

Tanba ne’e, Ministru Francisco hasoru malu ho Vise-Prezidente Ezekutivu Asuntu Explorasaun no Dezenvolvimentu Empreza Woodside Energy, Andy Drummond ho ekipa hodi determina timeline dahuluk.

“Enkontru ba negosiasaun ne’e planeia iha outubru 2023, depois ekipa ténika Governu ho tékniku konsórsiu sira sei define loloos enkontru sira tuir mai hodi to’o iha alvu sira,” Ministru hateten hafoin hasoru malu ho ekipa hosi Woodside Energy, iha ninia Gabinete, Farol.

Notísia relevante : Ministru Petróleu no Minerál rekoñese prosesu negosiasaun Greater Sunrise paradu

Fatin ba negosiasaun bele iha Timor-Leste bele mós iha Austrália, depende ba desizaun koletiva.

“Negosiasaun ne’e rasik presiza tuur hamutuk hodi ko’alia didi’ak tanba IX Governu foin hahú serbisu durante fulan-rua, ne’ebé iha fulan-rua ne’e ami utiliza ba halo buat sira ne’ebé nesesáriu  tanba finaliza ona, entaun ba oin foku ba negosiasaun,” nia subliña.

Tanba ne’e, Ministru Francico konsidera prezensa empreza operadór iha projetu Greater Sunrise ne’e importante tebes. Tuir ajenda katak iha tersa (19/09) sei hasoru malu mós ho reprezentante Austrália ba Greater Sunrise, Steve Btacks, tanba iha serbisu rua mak sei paralelu.

“Ida ita ho empreza sira, no ida seluk Governu ho Governu. Timor-Leste liuhosi ita-nia reprezentante sira sei serbisu ba dokumentu ida importante ho estudu sira, buat sira ne’e sei la’o paralelu hodi ita hetan rezultadu sira ne’ebé ita hakarak,” nia dehan.

Iha mandatu VIII Governu Konstitusionál suspende negosiasaun tanba iha dezintendimentu entre join venture sira.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!