MSSI reajusta benefisiáriu bolsa da mãe 5.453 iha Oé-Cusse
OÉ-CUSSE, 18 setembru 2023 (TATOLI – Ministériu Solidariedade Sosiál no Inkluzaun (MSSI) sei halo reajustamentu ba benefisiáriu bolsa da mãe na’in-5.453 iha Rejiaun Administrativa Espesiál Oé-Cusse Ambeno (RAEOA).
Notisia relevante: OJE 2023: MSSI prevee miliaun $140-resin ba “bolsa da mãe jersaun foun”
Pontu Fokál Bolsa da Mãe Kondisionál no Arollamentu Bolsa da Mãe Jerasaun Foun iha RAEOA, Luis Sérgio Hanjam da Costa, hateten, atividade reajustamentu ne’e sei hala’o durante loron 10, bazea ba Dekretu-Lei númeru 18/2012, loron 04 fulan abríl, kona-bá subsídiu apoia kondisionál ‘bolsa da mãe’ ho nia regulamentu sira liuhosi diploma ministériál, númeru 27/2012, loron 19 fulan setembru, kona-bá regulamentu subsídiu apoia kondisionál ‘bolsa da mãe’.
Tanba prevista iha artigu 31, katak kada tinan rua benefisiáriu sira tenke reajusta no atualiza sira-nia situasaun familiár hodi konfirma sei elijível ka lae nu’udar benefisiáriu.
Tán ne’e iha segunda ne’e, parte MSSI iha Rejiaun Oé-Cusse, konvida autoridade lokál sira, xefe suku, xefe aldeia, jestór no Ofisiál Polísia Suku (OPS) realiza enkontru koordenasaun, hodi define kalendáriu ba atividade reajustamentu ne’e.
“Objetivu hosi reajustamentu ne’e, atu identifika loloos benefisiáriu sira, iha idak-idak nia residénsia, kona-bá utilizasaun osan Estadu ne’ebé durante sira hetan ona, uza ba saida, sei bele simu ka lae, ida-ne’e mak ita sei halo tama suku sai suku durante loron 10 nia laran,” Luis Sérgio Hanjam da Costa, ko’alia iha enkontru ne’e.
Nia informa, iha Rejiaun Oé-Cusse labarik na’in-5.453 mak sai benefisiáriu ba programa bolsa da mãe, mai hosi sub-rejiaun haat, Nítibe suku lima, Oésilo suku tolu, Pássabe suku rua no Pante Makasar suku ualu.
Hanesan, iha sub-rejiaun Nítibe mai hosi suku Ban-Afi 246, Bene-Ufe 245, Lela-Ufe 295, Suni-Ufe 206, Usitaku 286 hamutuk 1.278.
Iha sub-rejiaun Oésilo, mai hosi suku Usitasa’e 233, Bobometo 707, Usitaqueno 84 hamutuk 1.024, no sub-rejiaun Pássabe, suku Abani 518, Malelat 192 hamutuk 710.
No iha sub-rejiaun Pante Makasar, mai hosi suku Costa 678, Bobokase 213, Cunha 304, Lalisuk 250, Lifau 222, Naimeko 194, Nípani 155 no Taiboko 425 hamutuk 2.441.
Xefe suku Taiboko, Joaquim Tafin, agradese ba Governu liuhosi MSSI, tanba liuhosi atividade ne’e bele identifika loloos benefisiáriu sira.
“Dalaruma inan-aman divórsiu ka soe malu, oan sei hela ho inan, maibé nia aman mak reprezenta simu osan ne’e, depois osan ne’e la to’o labarik, ida-ne’e problema ida, entaun liuhosi reajustamentu bele identifika loloos nia sei presiza simu ka lae ona,” nia orgullu.
Tuir nia, dalaruma balu daudaun ne’e kaben no iha oan ona, maibé sira sei simu nafatin, entaun liuhosi programa ne’e bele hadi’a nune’e sistema pagamentu ne’e ho loos.
Xefe suku Naimeko, Marcos Liu Abi, agradese tanba liuhosi reajustamentu ne’e, bele rezolve mós lista pendente sira, durante ne’e seidauk simu, depois bolsa da mãe ne’e merese ba labarik tinan hitu (7) ba to’o 17.
“Entaun liuhosi reajustamentu ne’e ita bele justifika atu hetene, tanba balu harii uma-kain ona, maibé sei simu nafatin, entaun ida-ne’e ema bele desfonfia katak, autoridade lokál mak halo hamutuk ho parte pagamentu sira, entaun presiza hadi’a mós ida-ne’e,” nia katak.
Daudaun ne’e parte MSSI destaka ona ofisiál sira hamutuk na’in-26 iha suku 18, sei hetan akompañamentu hosi hosi parte MSSI rejionál hamutuk na’in-11 hodi kobre territóriu Oé-Cusse.
Notísia relevante: Governu oferese transporte no komputadór hodi mellora servisu sosiál iha RAEOA
Jornalista : Abílio Elo Nini
Editór : Evaristo Soares Martins
