BOBONARO, 18 setembru 2023 (TATOLI) – Kondisaun sala aula haat iha Ensinu Báziku Filiál (EBF) ne’ebé lokaliza suku Lour, postu administrativu Bobonaro, munisípiu Bobonaro, la segura ba estudante primeiru siklu sira tanba infraestrutura edifísiu nia aliserse to’o kakuluk kuaze lahuk ona.
Koordenadór EBF Lour, Câncio Pacheco, informa, eskola refere konstrui dezde okupasaun Indonézia iha tinan 1995 to’o agora governu seidauk tau prioridade atu halo konstrusaun foun.
Responsável masimu EBF ne’e avalia katak, kondisaun ne’e difikulta tebes prosesu ensinu no aprendizajen.
“Ami tempu udan, anin-boot, prosesu aprendizajen labele la’o, tanba ha’u ta’uk kalen ka ai monu kona labarik sira, entaun afeta ne’e mai profesór sira,” nia informa ba jornalista sira iha Lour, segunda ne’e.
Enkuantu sala aula haat refere, sala tolu akumula estudante primeiru siklu hahú primeiru to’o terseiru anu no sala ida empresta hosi ensinu pre-eskolár ho totál estudante na’in-82.
EBF ne’e mós hasoru problema kona-bá bee-moos no menus mobiliáriu hanesan meza no kadeira.
“Dalaruma labarik balu tuur hiti malu de’it, tanba kadeira meza la to’o, ha’u dehan de’it ba sira husik ba ita atu halo nusá, ita halo proposta ba mós ema seidauk responde ne’e,” nia afirma.
Koordenadór ne’e haktuir, proposta kona-ba eskola ne’e submete ona ba Servisu Munisipál Edukasaun Bobonaro no nasionál no hetan ona informasaun verbal katak Governu tau ona prioridade iha tinan 2024.
Ligadu ho asuntu ne’e, Koordenadora pre-eskolár Lour, Cristina de Jesus Mendonça, husu ba Ministériu Edukasaun atu aselera prosesu konstrusaun tanba konsidera sala aula hirak-ne’e la dignu ona ba estudante sira.
“Ami empresta de’it fatin ne’e, tanba ami-nia edifísiu laiha. Ida-ne’e ami sente ladi’ak tanba ami-nia sala ne’e ho kondisaun ne’ebé mak aat, iha tempu udan ho anin ami ta’uk atu hanorin, tanba kalen ho janela, plafon ai sira mós aat hotu,” nia katak.
Enkuantu totál estudante iha EBF Lour komposta hosi ensinu báziku primeiru siklu to’o terseiru siklu hamutuk na’in 397, feto 118 no mane 179, ho totál profesór na’in-18.
Notísia relevante: Edukasaun Bobonaro presiza tán karteira eskolár 165 ba eskola foun
Jornalista : Sérgio da Cruz
Editór : Evaristo Soares Martins
