STAE klarifika brigada na’in-rua iha Suni-Ufe la simu osan hafoin eleisaun parlamentár
OÉ-CUSSE, 18 setembru 2023 (TATOLI – Diretór Sekretariadu Tékniku Administrasaun Eleitorál (STAE), Luiza da Costa, klarifika kona-bá razaun brigada na’in-rua iha suku Suni-Ufe, sub-rejiaun Nítibe, Rejiaun Administrativa Espesiál Oé-Cusse Ambeno (RAEOA), la simu osan hafoin eleisaun parlamentár.
Notísia relevante: Brigada na’in-rua hosi Suni-Ufe RAEOA seidauk simu osan hafoin eleisaun parlamentár
“Loos sira na’in-rua ne’e, iha feto ida no mane ida, maibé feto ninian ne’e, fulan rua tama ona hela fulan rua, ida mane ne’e seidauk fulan nia osan durante fulan haat, tanba momentu eleisaun parlamentár ne’e, sira-nia kontratu ba fulan haat,” nia klarifika ba Agência Tatoli iha Oé-Cusse, segunda ne’e.
“Nia osan seidauk tama fulan haat ne’e tanba nia servisu dupla, hala’o kna’ar rua, ida nia servisu hanesan apoia suku no sai mós brigadista iha eleisaun, entaun banku deteta nia konta bankária ne’e maka sistema la aprova, ne’e maka nia osan ne’e la tama to’o agora,” nia katak.
Tuir diretora ne’e katak, antes ne’e brigada ne’e rasik, konfirma direita iha parte STAE rejionál, no onesta katak, daudaun ne’e nia hala’o hela servisu iha apoia suku kona-bá programa PNDS nian iha suku Suni-Ufe.
Bainhira projetu ruma hosi PNDS atu hala’o iha suku Suni-Ufe, nia mak reprezenta suku ba foti osan uza nia konta bankária ne’e rasik, entaun serbisu dupla.
“Nia direitu insentivu ne’e $1000, kada fulan $250, entaun solusaun ba nia, mak ne’e, ami haruka nia ba konfirma direita iha STAE nasionál konfirma direita iha parte finansa nian,” nia katak.
Jornalista: Abílio Elo Nini
Editór: Evarito Soares Martins
